Bu gün Qərbi Kaspi Universitetində dövlət sifarişi əsasında təhsil alan bəzi tələbələr onlardan ödəniş tələb olunduğunu bildiriblər.

Onların sözlərinə görə, ödəniş etməyən tələbələrin imtahana buraxılmayacağı ilə bağlı xəbərdarlıq olunub: “Qərbi Kaspi Universitetində dövlət sifarişi ilə təhsil alan tələbələrə dünən universitetdən deyiblər ki, dövlət sizin ödənişləri tam ödəyə bilmir, ona görə də qalan pulları siz ödəməlisiniz. Ödəməsəniz, imtahanlara buraxılmayacaqsınız. Biz hansı sənəd əsasında pul ödəməliyik, niyə ödənişsiz qəbul olunduğumuz halda pul ödəməliyik?! Anlaya bilmirik”.

Ali məktəb belə bir əsas gətirməklə tələbələrdən pul tələb edə bilərmi?

Bununla bağlı Elm və Ali Təhsil üzrə Dövlət Agentliyindən  “Qafqazinfo"-ya bildirilib ki, universitetin bu addımı qanunsuzdur: “Dövlət sifarişi əsasında təhsil alan tələbələrdən təhsil haqqı formasında hər hansı ödənişin tələb olunması qanunaziddir. Dövlət sifarişi ilə təhsil alan tələbələrin təhsil haqları dövlət tərəfindən müvafiq qaydada təhsil müəssisələrinə ödənilir. Bu baxımdan, nə dövlət, nə də özəl ali təhsil müəssisəsi tələbədən həmin ödənişin hər hansı bir hissəsini tələb edə bilməz."

Universitetdən isə “Qafqazinfo”nun sorğusuna cavab olaraq bildirilib ki, həmin tələbələrin təhsili üçün nəzərdə tutulan vəsait 2025-ci il başa çatdığı üçün dövlət büdcəsinə geri qaytarıldığından tələbələrdən ödəniş tələb olunub: “Qanunvericiliyə əsasən, dövlət sifarişi ilə ali təhsil alan tələbələrin təhsil haqqı dövlət büdcəsinin vəsaiti hesabına həmin şəxslərin təhsil aldığı təhsil müəssisəsinə ödənilir. Əvvəllər bu vəsait Elm və Təhsil Nazirliyi tərəfindən ödənilirdi, hazırda isə Maliyyə Nazirliyi tərəfindən idarə olunur və təqdim edilən sənədlər əsasında birbaşa müqavilə tərəfdaşlarına köçürülür.

2025-ci ilin sentyabr–dekabr ayları üçün Qərbi Kaspi Universitetinə müvafiq vəsait ayrılmış, onun əhəmiyyətli hissəsi xərclənmiş, müəyyən hissəsi isə qalmışdır.

Hazırda universitetdə tələbələrin 40%-i dövlət sifarişi əsasında təhsil alır. Qərbi Kaspi Universitetində maliyyə fəaliyyəti tədris ili üzrə (2025 sentyabr – 2026 sentyabr) tənzimlənir və daxili xərclərə laboratoriyaların yaradılması, texniki vasitələrin alınması, eləcə də beynəlxalq akkreditasiya prosesləri daxildir. Bu mərhələdə ayrılmış büdcə vəsaitlərindən istifadə olunur.

Lakin 2026-cı ilin yanvar ayında həmin vəsaitin zəruri xərclər üçün istifadə edilməsi nəzərdə tutularkən məlum olmuşdur ki, 2025-ci il başa çatdığı üçün ayrılmış məbləğ dövlət büdcəsinə geri qaytarılmışdır. Dövlət sifarişi əsasında təhsil alan tələbələrə artıq göstərilmiş xidmətlərə görə universitetə ödənilməli olan vəsaitin silinməsi əsaslandırıla bilməz.

Qərbi Kaspi Universitetinin özəl hüquqi şəxs olduğu və vəsaitin universitetə aid olduğu Elm və Təhsil Nazirliyinə müraciət məktubunda qeyd olunub. Lakin məktubumuza hələ heç bir qurumdan rəsmi məlumat göndərilməyib”.

Universitetdən həmçinin bildirilib ki, hazırda Elm və Təhsil Nazirliyi, eləcə də Maliyyə Nazirliyindən sözügedən məsələ ilə bağlı geridönüş gözlənilir: “Hazırda universitetin 13 təhsil proqramının beynəlxalq akkreditasiya təşkilatından uğurla keçməsi barəsində bizə məlumat daxil olub. Beynəlxalq komissiyaların tövsiyələrinə əsasən yeni tədris məkanları, laboratoriya və texniki avadanlıqların alınması üzrə işlər aparılır ki, bu da xeyli vəsait tələb edir. Keçən il dövlət tərəfindən tələbələrin təhsil haqqı üçün ayrılmış vəsaitin universitetin sərəncamında olmaması səbəbindən İT və digər avadanlıqların alınması mümkün olmayıb.

Tələbələrə bu barədə tərəfimizdən məlumat verilib. Məlumat verildikdən sonra baş verən situasiyada günahkar universitet çıxarılır. Məsələ ilə bağlı universitetin aiddiyyəti təşkilatlara müraciəti hələ ki cavabsız qalır. Ümid edirik ki, müvafiq təşkilatlar universitetin göstərdiyi xidmətlərə görə, onun haqqı olan vəsaiti ödəməklə, təhsilin fəaliyyətində istifadə etmək imkanına da sahib olacaq.

Hazırda Elm və Təhsil Nazirliyi, eləcə də Maliyyə Nazirliyi ilə əlaqədəyik və geri dönüş gözləyirik. İctimaiyyətə gedişat barədə məlumat veriləcək”.