Azərbaycan Mərkəzi Bankının (AMB) açıqladığı son bank statistikası ölkənin kredit bazarında vaxtı keçmiş borcların həcmində nəzərəçarpan artım olduğunu ortaya qoyub. Məlumatlara görə, ümumi kredit portfelində problemli kreditlərin xüsusi çəkisi 2,1%-ə yüksəlib. Dəqiq rəqəmlərlə ifadə edildikdə isə vaxtı keçmiş borcların məbləğində illik müqayisədə 36%-lik kəskin artım qeydə alınıb.
Kredit portfelinin struktur analizi göstərir ki, problemli borcların artmasında əsas pay qısamüddətli kreditlərin üzərinə düşür. Bu kateqoriya üzrə vaxtı keçmiş borclarda 1,5 dəfə (50%) artım müşahid olunub.
Mütəxəssislərin fikrincə, qısamüddətli borclardakı bu kəskin sıçrayış əsasən iki mənbədən formalaşır:
Bank Olmayan Kredit Təşkilatlarının (BOKT) daha rahat şərtlərlə və yüksək faizlə verdiyi mikro və istehlak kreditləri;
Qısamüddətli istehlak borclanmasının artması və ödəniş qabiliyyətinin dərhal bərpa oluna bilməməsi.
Rəqəmlərdəki 36%-lik artım dinamik baxımdan diqqət tələb etsə də, ümumi makroiqtisadi və maliyyə sabitliyi baxımından vəziyyət hələ ki kritik həddə çatmayıb.
Xatırladaq ki, vaxtı ilə Azərbaycan bank sektorunda vaxtilə 6-7%-lik problemli kredit payı normativ göstərici hesab olunurdu. Ölkə tarixinin rəsmi rekordu isə 15,5% səviyyəsində qeydə alınıb.
Mövcud 2,1%-lik göstərici beynəlxalq bank standartları çərçivəsində idarəolunan risk dərəcəsi hesab edilsə də, qısamüddətli istehlak borclarındakı 1,5 dəfəlik artım Mərkəzi Bankın monetar və requlyativ nəzarəti gücləndirməsini zəruri edir.
E.Rüstəmli
“AzPolitika.info”
Şərhlər