Rusiyanın ən böyük onlayn ticarət platforması - “Wildberries”in təsisçisi və baş direktoru Tatyana Kim tutduğu vəzifədən ayrılıb. Bu kadr dəyişikliyi Avropa İttifaqının (Aİ) onun adını yeni sanksiyalar siyahısına daxil etməsindən cəmi üç gün sonra baş verib.
“AzPolitika” xəbər verir ki, Rusiya Hüquqi Şəxslərin Vahid Dövlət Reyestrinin məlumatlarına əsasən, noyabrın 19-dan etibarən “Wildberries” MMC-nin yeni baş direktoru Aleksey Kulikov təyin edilib. O, həmçinin birləşmiş “RWB” (Wildberries və “Russ” reklam agentliyi) qrupuna daxil olan “Dijiko” reklam agentliyinə və “VB İnjinirinq” şirkətinə rəhbərlik edir.
“Wildberries” və “Russ”un birləşməsi nəticəsində yaradılan “RWB” şirkətlər qrupunun mətbuat xidməti Tatyana Kimin vəzifədən getməsinin marketpleysin gündəlik əməliyyat fəaliyyətinə təsir göstərməyəcəyini açıqlayıb. Qurumun məlumatında qeyd olunur ki, əməliyyat idarəçiliyi artıq 2024-cü ildən əsas qrup şirkəti olan “RWB”yə keçib, Tatyana Kim isə qrupun strateji inkişafı ilə məşğul olmağa davam edəcək. Şirkət həmçinin Aİ-nin Kimin barəsində tətbiq etdiyi sanksiyaların biznesə təsir etməyəcəyini iddia edib.
Bununla belə, kadr dəyişikliyinin zamanlaması diqqət çəkir: noyabrın 11-də Aİ ölkələrinin daimi nümayəndələri tərəfindən razılaşdırılan və noyabrın 16-da dərc olunan yenilənmiş sanksiya siyahısına (ümumilikdə 145 fiziki və hüquqi şəxs) Tatyana Kimin də adı daxil edilib. Brüssel Kimin hədəf alınmasını “Wildberries”in Rusiyanın ən böyük vergi ödəyicilərindən biri olması və platformanın Rusiya ordusu üçün hərbi və ikili təyinatlı malların satışını asanlaşdıraraq təchizat şəbəkəsi kimi fəaliyyət göstərməsi ilə əsaslandırıb.
Tatyana Kimin sanksiyalara düşməsi və rəhbərlikdən uzaqlaşması “Wildberries”in Rusiya-Ukrayna müharibəsi fonunda yaşadığı ağır sınaqlarla eyni dövrə təsadüf edir:
Anbarların kütləvi sıradan çıxarılması: Ötən yay ərzində Rusiyanın müxtəlif bölgələrində yerləşən “Wildberries” anbarları və logistika mərkəzləri Ukrayna pilotsuz uçuş aparatlarının (PUA) kütləvi hücumlarına məruz qalıb. Nəticədə şirkətin bütün anbar sahələrinin 74 faizi sıradan çıxıb, ən böyük 10 anbardan 7-si hələ də fəaliyyətini bərpa etməyib.
Nəhəng maliyyə itkisi: Satıcıların itkiləri də daxil olmaqla, avqustun ortalarına olan ümumi zərər 800 milyard rublu ötüb.
“Qanuni hərbi hədəf” arqumenti: Kiyev “Wildberries”i qanuni hərbi hədəf hesab edir. Bunun səbəbi onlayn platformanın çeşidlərində həm birbaşa hərbi, həm də ikili təyinatlı məhsulların – dronların və onların ehtiyat hissələrinin, avtomat aksesuarlarının, teplovizorların, zirehli jiletlərin və digər ləvazimatların yer almasıdır. Rusiya ordusuna dəstək verən könüllülər bu vasitələri məhz həmin platforma üzərindən alaraq cəbhəyə göndərirdilər.
Qeyd edək ki, “RWB”nin mülkiyyət strukturunda da son günlər optimallaşdırma və təsisçi məsuliyyətlərinin yenidən bölüşdürülməsi ilə bağlı dəyişikliklər qeydə alınıb.
“AzPolitika.info”


Şərhlər