Türkiyəyə dəhşət yaşadanın anası: "6 aydır ki..."

"Sadəcə yaxşı olduqlarını və narahat olmamağımı deyirdilər"

Türkiyənin Şanlıurfa vilayətinin Suruç rayonunda 32 nəfərin ölümünə səbəb olan terror aktını törətməkdə əsas şübhəli bilinən Ədurrəhman Alagözün anası danışıb.

ANS PRESS-in məumatına görə, 20 yaşlı gəncin anası Semüre Alagöz bildirib ki, o, oğlu ilə sonuncu dəfə Ramazan ayından əvvəl telefonla danışıb.

Ananın sözlərinə görə, oğulları Ədurrəhman və Yunus Alagöz 6 ay əvvəl ölkəni tərk ediblər. "Oğlum Ədurrəhman rəngsaz idi. Adıyaman rayonunda böyük qardaşı Yunusla işləyirdi. Evi o ikisi dolandırırdı. Xaricə əvvəlcə Ədurrəhman getdi, sonra isə Yunus. 6 aydır ki, Türkiyədə deyillər. Nə iş gördüklərini bilmirəm, demirdilər. Sadəcə yaxşı olduqlarını və narahat olmamağımı deyirdilər. İnanın ki, hansı ölkəyə getdiyini də bilmirəm. Yaxın vaxtlarda geri qayıdacaqlarını demişdilər. İŞİD-ə qoşulub-qoşulmadıqlarını və ya Suriyada döyüşlərə gedib-getmədiklərini də bilmirəm", - Semüre Alagöz deyib.