“Son günlər adı qalmaqallarda hallandırılan "Bakı" futbol klubunun prezidenti, məşhur iş adamı Hafiz Məmmədov (Hafka) ölkədən qaçarkən saxlanılıb”.Bu barədə qaynar.info saytı xəbər yayıb. Sayt iddia edir ki, Hafiz Məmmədov ölkədən qaçarkən hüquq-mühafizə orqanları tərəfindən Bakı Hava Limanında saxlanılıb.
Məlumatı yayan mənbə - qaynar.info iddia edir ki, hazırda iş adamı nəzarətdədir. Lakin hansı orqanın nəzarətində olduğu məlumatda qeyd edilmir.
"Bakı" futbol klubunun prezidentinin adı son günlər mətbuatda çox hallanırdı. Belə ki, "Baghlan Group"-un prezidentinin biznes fəaliyyətindəki "axsamalar", ölkədə ən güclü futbol kulublarından biri hesab olunan "Bakı" futbol klubunun bazasının satışa çıxarılması, "Bank of Azerbaijan" ətrafında yaranan böhran və “Hafka”nın nəqliyyat naziri Ziya Məmmədovla əlaqələri medianın gündəmindən düşmürdü.
Daxili İşlər Nazirliyinin mətbuat xidmətinin sözçüsü Orxan Mansurzadə qaynar.info-nun sorğusuna cavab olaraq deyib ki, bu barədə məlumatı yoxdur.
Bu məlumatı mövzunun ictimai əhəmiyyətini nəzərə alaraq yayırıq, bununla da ilgili orqanların, ya da Hafiz Məmmədovun reaksiya verəcəyinə ümid edirik.
Şərhlər