"BÜTÜN DÜNYA GÖRÜR Kİ, TÜRKİYƏ-AZƏRBAYCAN BİRLİYİ NƏ DEMƏKDİR”- Prezident İlham Əliyev

"Xoş gəlmisiniz, əziz Mövlud bəy, sizi salamlayıram. Şadam ki, siz gəlmisiniz. Siz Azərbaycanda dəfələrlə olmusunuz. Amma bu səfərin xüsusi önəmi var. Azərbaycan üçün o qədər də asan olmayan bir dönəmdə sizin gəlməyiniz əlbəttə ki, xüsusi önəm daşıyır. Bu, qardaş ölkənin açıq dəstəyinin təzahürüdür. Bu dəstəyə görə Azərbaycan xalqı qardaş Türk xalqına və onun Prezidentinə dərin minnətdarlıq hissi ilə yaşayır".

"Report" xəbər verir ki, bunu Azərbaycan Respublikasının Prezidenti İlham Əliyev oktyabrın 6-da Türkiyə Respublikasının Xarici İşlər naziri Mövlud Çavuşoğlunun başçılıq etdiyi nümayəndə heyətini qəbul edərkən deyib.

"Mənim əziz qardaşım, hörmətli Prezident Rəcəb Tayyib Ərdoğan ilə bu günlərdə təmaslarım, onun çox açıq, qətiyyətli bəyanatları bütün dünyaya göstərdi ki, Azərbaycan tək deyil. Azərbaycanın yanında Türkiyə kimi dünya miqyasında böyük bir güc olan dövlət var, qardaş ölkə var. Bu dəstək bizi ruhlandırır, bizə əlavə güc verir və eyni zamanda, bölgədə sabitliyin, əmin-amanlığın təmin edilməsi üçün önəmli rol oynayır. Mən bunu bu günlər ərzində demişəm ki, Türkiyə bölgədə sabitləşdirici rol oynayır. Türkiyənin bölgədə və dünyada yalnız sülhə hesablanmış siyasəti artıq öz nəticələrini verməkdədir, həm Yaxın Şərq bölgəsində, eyni zamanda, Qafqaz bölgəsində. Ona görə Ermənistanın növbəti hücumu ilə əlaqədar bu gün yaranmış vəziyyət bir daha onu göstərir ki, Türkiyə həm regionda, həm dünyada söz sahibidir. Əlbəttə ki, bu, bizi gücləndirir, ruhlandırır. Bu gün həm bizim xalqlarımız, həm də bütün dünya görür ki, Türkiyə-Azərbaycan birliyi nə deməkdir.

Əziz qardaşım, hörmətli Prezident Rəcəb Tayyib Ərdoğan ilə biz bu məsələ ilə bağlı dəfələrlə öz sözlərimizi demişik ki, Türkiyə-Azərbaycan birliyi bütün dünya üçün örnək olmalıdır. Bu gün biz real həyatda bunu göstəririk, sübut edirik və bu birliyin gələcəyi, hesab edirəm ki, bölgədə dayanıqlı sülhün təmin edilməsi üçün əsas şərt olacaqdır", dövlət başçısı vurğulayıb. 

Prezident İlham Əliyev qeyd edib ki, Türkiyə-Azərbaycan birliyi bütün dünya üçün örnək olmalıdır: "Bu gün biz real həyatda bunu göstəririk, sübut edirik və bu birliyin gələcəyi, hesab edirəm ki, bölgədə dayanıqlı sülhün təmin edilməsi üçün əsas şərt olacaqdır".

Türkiyənin Xarici İşlər naziri Mövlud Çavuşoğlu  Azərbaycan xalqına dəstəyimi göstərmək üçün bu gün Bakıya gəldiyini bildirib: "Prezident Rəcəb Tayyib Ərdoğanın salamını sizə çatdırıram. Biz Azərbaycanla kədərdə də, sevincdə də birgə olacağıq”.

“Bir daha bildirmək istəyirəm ki, Dağlıq Qarabağ Azərbaycandır. Ermənistanın oradan çəkilməsi mövzusunda bu günlərdə beynəlxalq ictimaiyyətin birmənalı reaksiyası olmayıb”, - o deyib.

“Dünya Azərbaycanın, beynəlxalq hüququn yanında olmalıdır. Bütün çağırışların hamısı atəşkəsə yönəlikdir. Atəşkəs indiyədək olub və nə oldu? Qısa müddət sonra ermənilər yenə hücum edir. Atəşkəs olsun, amma nəticəsi nə olsun? Ermənistana “dərhal Azərbaycan ərazisindən çəkil” deyə bilirsinizmi?”- deyə, Mövlud Çavuşoğlu bildirib.

“30 ildir eyni çağırışlar var. İşğalçı ilə Azərbaycanı eyni səviyyədə tuturlar. Bunun belə getməyəcəyini bütün dünya anlamalıdır. Biz bu məsələnin sülh yolu ilə həll olunması üçün bütün cəhdləri etdik”, - nazir deyib.