ERMƏNİLƏR EVLƏRƏ OD VURUB GEDİRLƏR! - BBC Kəlbəcərdən reportaj hazırlayıb + VİDEOLAR (Yenilənib)

“Bu günü Dağlıq Qarabağın Dadivank kəndindən (Xudavəng, Kəlbəcər rayonu – “Report”) keçirdik. Bölgə iki gün ərzində Azərbaycana təhvil verilməlidir. Bir çox yerli sakin evlərini boşaldıb gedirdi. Bəziləri isə azərbaycanlıların əlinə keçməməsi üçün evlərinə od vurublar”.

Bunu BBC-nin müxbiri Vill Vernon tvitterdə yazıb.

We spent today in the village of Dadivank in Nagorno-Karabakh. The region is due to be handed over to Azerbaijan in two days. Many locals were stripping their houses and leaving. Some even set fire to their homes to prevent them falling into Azeri hands. pic.twitter.com/NImQGPmDuo

— Will Vernon (@BBCWillVernon) November 12, 2020

***

Noyabrın 10-u imzalanan üçtərəfli bəyanata əsasən, Ermənistan öz üzərinə öhdəlik götürüb ki, qarşıdan gələn günlərdə Azərbaycanın işğal altında olan Ağdam, Kəlbəcər və Laçın rayonlarından çıxacaq. Nəticə etibarilə, qarşıdan gələn qış müvsümündə qan tökülmədən, şəhid verilmədən ərazi baxımdan böyük rayonlarımız da işğaldan azad olunur. Rusiya sülhməramlılarının əraziyə gəlməsi Ermənistan qoşunlarının Azərbaycanın işğal olunmuş ərazilərindən çıxarılması ilə sinxron qaydada aparılır. Həmçinin Türkiyə ilə Rusiya arasında sülhməramlıların Dağlıq Qarabağda fəaliyyəti monitorinqi ilə əlaqədar sənəd də imzalanıb.

Ermənilər bəyanatda boşaldılması nəzərdə tutulan 3 rayonu artıq tərk etməyə başlayıblar. BBC-nin reportajında da görünür ki, ermənilər aparılması mümkün olan hər şeyi özləri ilə götürürlər, hətta pəncərə çərçivələrini, unitazları belə aparırlar. İşğal olunmuş ərazilərdə maddi mədəni sərvətlərimizin dağıdılması və qarət olunması indi də davam edir. Ermənilər apara bilmədiyi hər şeyi isə yandırır, məhv edirlər.

Prezident İlham Əliyev bununla bağlı faktı oktyabrın 28-də “Interfax”a müsahibəsində bildirmişdi və uzaqgörənliklə xəbərdar etmişdi:

“Biz Füzuli şəhərini işğaldan azad edəndə orada bircə salamat bina tapa bilmədik. Təsəvvür edirsinizmi? Bütün şəhərdə, halbuki orada 10 minlərlə insan yaşayırdı. Bircə bina da qalmayıb. Mənə zəng vurdular, dedim ki, bayrağı dirək üzərində qaldırın. Görün, onlar nə ediblər. Ağdamın, Cəbrayıl rayonunun xarabalıqlarına baxın. Hər şey dağıdılıb. Elə bil buradan vəhşilər keçiblər. Elə bil bunlar insan deyilmiş. Onlar hər şeyi söküb-dağıdıblar. Evlərin damlarını, pəncərə çərçivələrini, hətta unitazları da. Bu, sadəcə, quldurluqdur”.

Beləliklə, dövlət başçısının humanist addımını – rayonları boşaldılması üçün verilən uzun müddəti sui-istifadə edən ermənilər bəyanata uyğun olaraq qaytarılacaq rayonları tərk edərkən belə əraziyə maksimum ziyan vurmağa çalışır, əzəldən azərbaycanlılara aid olan evləri yandırır. Əlbəttə, özünə məxsus olmayan əraziləri hələ 1993-cü ildə işğal edərkən azərbaycanlı əhaliyə yurdlarını tərk etməsi üçün 10 saat müddət verənlərin bu hərəkəti təəccüb doğurmamalıdır.

Kəlbəcərdən ermənilərin köçü ilə bağlı “Sputnik Armenia” da material yayımlayıb. "Sputnik Armenia"nın çəkiliş qrupunun məlumatına görə, Kəlbəcəri tərk edən ermənilər sözün həqiqi mənasında evləri, dükanları, elektrik yarımstansiyaları söküb dağıdırlar.

Ermənilər çoxlu sayda mikroavtobus və yük maşınlarında daşına bilən hər şeyi – ev əşyalarını, mebelləri, heyvanları aparırlar.

“Sputnik Armenia”nın da əməkdaşları ermənilərin yaşadıqları evlərə od vurduqlarını qeyd ediblər.

Xatırladaq ki, Azərbaycan Prezidenti İlham Əliyev, Ermənistanın Baş naziri Nikol Paşinyan və Rusiya Prezidenti Vladimir arasında imzalanmış bəyanata əsasən, Ermənistan Respublikası 15 noyabr 2020-ci il tarixinədək Kəlbəcər rayonunu, Ağdam rayonunu 20 noyabr 2020-ci il tarixinədək və 1 dekabr 2020-ci il tarixinədək isə Laçın rayonunu Azərbaycan Respublikasına qaytarmalıdır.