ABŞ Prezidenti Cozef Bayden Myanmadakı hərbi çevriliş liderlərinə qarşı sanksiyalar tətbiq edən sərəncam imzalayıb.
“AzPolitika.info” xarici KİV-ə istinadla xəbər verir ki, Bayden Ağ Evdə çıxışı zamanı Vaşinqtonun bu həftə hədəflərin ilk turunu təyin edəcəyini və eyni zamanda səhiyyə, vətəndaş cəmiyyəti qrupları və birbaşa olaraq fəaliyyət göstərən digər sahələrə dəstəyini qoruyaraq, Myanma hökumətinə fayda gətirən ABŞ aktivlərinin dondurulması ilə birlikdə ciddi ixrac nəzarəti tətbiq edəcəyini söyləyib: “Bu gün çevriliş liderlərinə təsir göstərməyə başladığımız bir sıra tədbirləri elan edirəm. ABŞ hökuməti, generalların ABŞ-da saxlanılan Myanma hökumət fondlarından 1 milyard dollara qeyri-qanuni giriş imkanlarının qarşısını almaq üçün addımlar atır və bu gün çevrilişə səbəb olan hərbi rəhbərliyə qarşı dərhal sanksiya tətbiq etməyimizə imkan verən yeni bir sərəncamı təsdiqləyirəm”.
Prezident, həmçinin çevrilişə etiraz edən nümayişçilərə qarşı şiddəti qınayaraq, bunu qəbuledilməz adlandırıb. O, ABŞ-ın əlavə tədbirlər tətbiq etməyə hazır olduğunu və beynəlxalq tərəfdaşları ilə digər ölkələri bu səylərdə onlara qoşulmağa inandırmaq üçün çalışacağını deyib: “Birma hərbçilərini dövlət müşaviri Aun San Su Çji və prezident Vin Myin də daxil olmaqla, demokratik siyasi liderləri və fəalları dərhal sərbəst buraxmağa çağırıram. Hərbi qüvvələr ələ keçirilmiş hakimiyyətdən imtina etməli və 8 noyabr seçkilərində ifadə edilən Myanma xalqının iradəsinə hörmət göstərməlidir ”.
Myanmadakı vəziyyətin dərin narahatlıq doğurduğunu deyən Bayden, ABŞ-ın keçən həftə Birləşmiş Millətlər Təşkilatı Təhlükəsizlik Şurasının (BMTMŞ) toplanmasına kömək etdiyini və ölkədə demokratiyaya dəstək olaraq sərt bir açıqlama verdiyini bildirib.
“New York Times” qəzetinin yazdığına görə, 1990-cı illərdə, repressiv hərbi hökumətin ölkəni idarə etdiyi dövrdə Myanmaya sanksiyalar tətbiq edilib. Lakin keçmiş prezident Barak Obama bu sanksiyaları 2016-cı ildə ləğv edib.
Ordu, bir ildir fövqəladə vəziyyət elan edərək, 8 noyabr seçkiləri zamanı Su Çjinin NLD (Milli Demokratiya Uğrunda Liqa) partiyasının böyük qələbə qazandığı iddia edilən seçici saxtakarlığına qarşı "tədbir görəcəyini" vəd edib.
Laçın SƏMLA
“AzPolitika.info”
Şərhlər