Farsiyan Joranın bərəlmiş gözləri
İlhami Cəfərsoy
80-ci illərin əvvəli idi. Məni təyinatla o zaman APİ-nin filialı olan Xankəndi Pedaqoji İnstitutuna göndərmişdilər. Kafedraya girəndə erməni müəllimələrdən biri bizim millətimiz haqqında tikanlı sözlər dedi və mübahisəmiz başladı.
Deyişmənin qızğın yerində hiss etdim ki, kimsə qapının aralı yerindən bizi dinləyir. Dönüb baxanda fizika fakultəsinin dekanı Farsiyan Joranın bərəlmiş gözlərini gördüm. O məni dərsə göndərib özü içəri girdi.
Yolun yarısında dönüb geri qayıtdım. Görüm fars mənşəli o erməni mənim barəmda nə fitva verir?
Gözlədiyimin əksinə olaraq o mənimlə mübahisə edən qızı sıxma-boğmaya salmışdı:
-Axçi, külü qoyum sənin başına. Bu cavan tork ilə mübahisə eləmə. Subay oğlandır, qılığına gir, xoşuna gəl, qoy səni alsın. Elə ki, evində arvad oldun, qazandığı pulları ye, doğduğun uşaqları millətinə düşman elə.
Sabah səhər işə gələndə qızlar məni gülər üzlə qarşıladılar. Dünən qapının arxasından dekanın sözlərini eşitməsəydim və atamın qəzəbli baxışlarından qorxmasaydım, o axçiklərdən birini alıb multikultural ailə qurardım. Necə ki, bəziləri bunu etdilər. Ağdərəli Samvel Mamunsun bacısını alıb, Qarabağda ispolkom sədri, Bakıda nazir müavini oldular.
Gəlin düşünək, nəyə görə Azərbaycanda korrupsiya, rüşvətxorluq Ermənistanla müqayisədə bu qədər çoxdur?
Çünki kabinetlərin bir hissəsində hələ də Zəhranın yox, Aşxalusun göbəyindən çıxanlar əyləşiblər. O hibridgenlər bizə Farsiyan Joranın gözlərilə baxırlar. O metislər yumşaq kresloda əyləşib pul sayırlar...
Hibridgenlər milləti
qaz yerinə yoldular,
Dosentə iş yazdırıb
akademik oldular.
General rütbəsilə
ordumuza doldular,
Rusun skripkasında
çalındıqca havamız.
Toplarımız sussa da,
bitməyibdi davamız.
İş başına keçən kəs
qurd kimi quyruq qapır,
Klanlar və filanlar
adam minir, at çapır.
Pisməramlar mərəkdən
raket, pulemyot tapır.
Yabançı notlar ilə
bəstələnir nəvamız,
Toplarımız sussa da,
bitməyibdi davamız.
Dərd bir olsa, ölməyib
dözmək olar bəlkə də,
Ağ balığı yad yeyir,
gözüm qalıb kilkədə.
Kilsələrə müftəcə
qaz verilən ölkədə
Mənzillərdə limitlə
tüstülənir sobamız.
Toplarımız sussa da,
bitməyibdi davamız.
Çox sular bulandılar
yerin bu bölgəsində,
Villalar Avropanın
səfalı kölgəsində.
Azərbaycan, çəpiklər,
təpiklər ölkəsində
Qiymətlər göyə qalxıb,
boş qalıbdı tavamız.
Toplarımız sussa da,
bitməyibdi davamız.
Şərhlər
Hər hansısa bir şərh yazılmayıb.