Meksikanın şimalındakı Sonora ştatının Sonoyta-San-Luis-Rio-Kolorado magistral yolunda sərnişin avtobusu yük maşını ilə toqquşub. “Report” xəbər verir ki, bu barədə regionun prokurorluğu tvitterdəki hesabında bildirib.
Məlumata görə, qəza zamanı 16 nəfər həlak olub, 20-dən çox insan müxtəlif xəsarətlər alıb.
"Hazırda 22 nəfərin xəsarət alması məlumdur, onlardan 6-sı ağır vəziyyətdədir və 16 nəfər həlak olub. Xilasedici əməliyyat davam edir”, - paylaşımda deyilir.
Faciənin mümkün səbəbləri haqqında məlumatlar verilmir.
Prokurorluğun əməkdaşları avtomobil qəzasının başvermə şəraitini araşdırmağa başlayıb.
Şərhlər