PREZİDENT PA-nın ŞÖBƏ MÜDİRİNİ YENİ VƏZİFƏYƏ TƏYİN ETDİ - DOSYE (Yenilənib)
Şahin Məhərrəm oğlu Əliyev Ədliyyə Nazirliyinin Ədliyyə Akademiyasının rektoru təyin edilib. Prezident İlham Əliyev bununla bağlı sərəncam imzalayıb. Sərəncam imzalandığı gündən qüvvəyə minir.
Qeyd edək ki, Şahin Əliyev bu təyinatadək Prezident Administrasiyasının (PA) Hüquq ekspertizası şöbəsinin müdiri vəzifəsində işləyib. O, həmin vəzifəyə 29 noyabr 2019-cu il tarixində təyin edilmişdi.
Prezident Administrasiyasının Hüquq ekspertizası şöbəsi yenicə ləğv edilib.
Ş.Əliyev daha əvvəl Prezident Administrasiyasının Qanunvericilik və hüquq ekspertizası məsələləri şöbəsinin müdiri vəzifəsini icra edib.
O, Azərbaycanda dövlət qulluğunda uzunmüddətli səmərəli fəaliyyətinə görə 2020-ci ilin yanvarında “Şöhrət” ordeni ilə təltif edilib.
Şahin Məhərrəm oğlu Əliyev 1960-cı ildə Bakıda anadan olub. O, Daşkənd Dövlət Universitetinin məzunudur.
1984-cü ildən əmək fəaliyyətinə başlayan Ş.Əliyev Azərbaycan SSR Elmlər Akademiyasının Fəlsəfə və Hüquq İnstitutunda baş laborant, kiçik elmi işçi işləyib. Buradan pedaqoji işə keçən Ş.Əliyev 1988-89-cu illərdə Azərbaycan Dövlət Universitetinin müəllimi olub.
1989-cu ildə isə onun dövlət işindəki karyerası başlayıb. Ş.Əliyev həmin il Azərbaycan SSR Ali Sovetinin Rəyasət Heyətinin Hüquq şöbəsinin müdir müavini təyin edilib. 1991-ci ilin yanvarında Azərbaycan Respublikası Ali Soveti Katibliyinin Qanunvericilik və hüquq qaydaları məsələləri üzrə şöbəsində müdirin müavini vəzifəsinə keçib. Daha sonra həmin şöbədə müdirin birinci müavini işləyən Ş.Əliyev 1991-ci ilin sonunda Prezident Aparatında Qanunvericilik və hüquq ekspertizası məsələləri şöbəsinə müdir təyin olunub.
O, 1991-ci ildən 2022-ci ilə kimi Prezident Administrasiyasında şöbə müdiri işləyib.
Ş.Əliyev hüquq elmləri namizədidir.
Şərhlər
Əgər Hüquq və İnsan Haqları İnstitutunun direktoru saadsız,rüşvətxor, Rusiyapərəst Fars dili müəllimi, hüquq elmləri doktoru Aytən Mustafazadə qalacaqsa, vay O Mərkəzin halına. Yenə ora "ölü can"ları doldurub, qaz vurub, qazan dolduracaq.
Şahin Əliyev hələ bilmir ki, Ramiz Mehdiyevi özünün ağsaqqalı adlandırdığı, direktoru olduğu Hüquq və İnsan Haqları İnstitutuna 5-ci kolonun rusbaşlarını toplayan, millətini sevən, vətənpərvər, savadlı hüquqşünasları minbir bəhanə ilə işdən qovan korrupsioner Aytən Mystafazadə onların başına nə ooyunlar açacaq.
Şahin Əliyev Bakıda doğulsa da Ağdamlıdır.