Tovuzun Dondar Quşçu kəndində 10 yaşlı Nərmin Quliyevanı qətlə yetirməkdə ittiham olunan İlkin Süleymanovun cinayət işi ilə bağlı məhkəmə prosesi davam etdirilib.
APA-nın xəbərinə görə, bu gün Gəncə Ağır Cinayətlər Məhkəməsində hakim Dadaş İmanovun sədrliyi ilə keçirilən iclasda təcridxanada İlkin Süleymanovla eyni kamerada saxlanılan Raqif Mirzəyevin dindirilməsi davam etdirilib. Şahid ifadəsində onunla eyni kamerada saxlanılan və sonradan İlkin Süleymanovun əleyhinə ifadə verən şəxslərin dediklərinin yalan olduğunu deyib.
O, İlkin Süleymanovun heç vaxt cinayət törətməsini etiraf etmədiyini bildirib: "İlkinlə bir kamerada olduğumuz müddətdə heç vaxt uşaq öldürdüyünü deməyib. Hamı da onun günahsız olduğunu bilirdi".
Prosesdə Nərmin Quliyevanı sonuncu dəfə görən iki məktəblinin hazırlıq müəllimi Laləzar Məmmədova da ifadə verib. Bundan əvvəlki iclasların birində ifadə verən məktəblilər noyabrın 21-i (Nərmin Quliyeva itkin düşən gün) hazırlıqdan qayıdan vaxt, təxminən 16:30-da Nərmini nənəsigilin evinin yanında gördüklərini deyiblər.
İttiham aktında isə qeyd olunub ki, İlkin həmin gün saat 14:30-da Nərmini evə dəvət edib və 47 gün orda saxlayıb. Bugünkü prosesdə ifadə verən müəllim Laləzar Məmmədova şagirdlərin hazırlıq saatının vaxtı ilə bağlı dediklərini təsdiq edib. Müəllim bildirib ki, hazırlıq dərsi həmişə saat 14:30-16:30 arasında olub.
Proses iyunun 3-də davam etdiriləcək.
Xatırladaq ki, 2019-cu ilin noyabrın 19-dan itkin düşən Tovuz rayonunun Dondar Quşçu kənd sakini, 10 yaşlı Nərmin Quliyevanın qətlə yetirilərək yandırılan meyiti 2020-ci il yanvarın 6-da kənd ərazisində aşkar edilib.
Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşlarından ibarət istintaq-əməliyyat qrupu tərəfindən cinayətin açılması istiqamətində həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində cinayəti törətməkdə şübhəli bilinən Dondar Quşçu kənd sakini, 1973-cü il təvəllüdlü Süleymanov İlkin İbrahim oğlu tutularaq istintaqa cəlb edilib.
İş üzrə çoxsaylı şahidlər dindirilib, məhkəmə-tibbi, məhkəmə-bioloji, məhkəmə-kimyəvi ekspertizaları təyin edilib və digər zəruri istintaq hərəkətləri aparılıb.
İ.Süleymanova Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələr ilə təqsirli bilinərək barəsində cinayət işi açılıb.
Şərhlər
1937-ci ildən qalma bir metod hələ də qüvvədədi bizlərdə:döyə-döyə boynuna qoymaq.”Boyuna aldırmaq” hələ cinayətin sübutu deyil,olsa-olsa əzablara-işkəncələrə dözməməyin nəticəsidir.İşkəncə verənin özünü işkəncə etsələr o da boynuna alar ki,o uşağı bu yox,mən öldürmüşəm.Bu sübutdurmu yəni?Tutulan adam cinayətkar olduğunu sübut etməməlidir,ittiham edən onun cinayət törətdiyini faktlarla sübut etməlidir ki,bu işə də məhkəmə baxır,polis deyil.Odur ki belə özbaşınalıqların qarşısını almaq üçün həbs edilənlərdən polis idarələrində yalnız ifadələrinin alınmağı məsələsi gündəmə gəlməlidir;ifadəsi alınır və məhkəməyə verilir.Vəssalam. Belə olanda polisdə rüşvətxorluq da sıfırlanar,hər yetəni tutub məhkəməyə vermək həvəsləri də minimuma enər.Çünki onsuz da məhkəmə hakimi gözəl bilir ki polisdə günahlar necə “boyuna alınır”.Və məhkəmədə bu yetərli hal hesab edilmir.Elə məhkəmə də onun üçün qurulub ki,məsələni aydınlaşdırsın görsün zorla boynuna qoyulubmu,yoxsa könüllü ifadə verib.Və bir halda ki məhkəmə işə əsaslı şəkildə baxacaq,onda polisdə “boyuna aldırmağ”ın mənası nədir yəni?
Cinayətkarın kim olduğunu dövlət orqanları da bilir.Görünür,həmin cani çox imkanlı və arxayın adamdır.Ancaq hər şeyi görən Allah var.Dövlətin verəcəyi cəzadan savınmaq imkanı olanları Allahın cəzasından heç kim qurtara bilməyəcək.
Hüquq mühafize orqanları tebii ki ,İlkini günahkar kimi cezalandırılmasına çalışacaqlar,eks teqdirde onlar yerlerini deyişmelidirler-İlkin azadlığa,onlarsa hebsxanaya gönderilmelidirler.