Rus ordusu Ukraynada acı məğlubiyyətlərə uğradıqca, Rusiyada siyasi gərginliyin dərəcəsi artmağa başlayır.

“AzPolitika.info” xəbər verir ki, aqressivliyi və imperialist düşüncəsi ilə Putin hakimiyyətindən heç də geri qalmayan Rusiya Kommunist Partiyasının lideri Gennadi Zyuqanov Kremli zəiflikdə günahlandırıb və ümumi səfərbərlik elan olunmasını tələb edib.

Çoxdandır səsi çıxmayan Zyuqanov Dumanın payız sessiyasının açılışında çıxış edərək bildirib ki, Ukraynada baş verənlər artıq xüsusi hərbi əməliyyat statusundan çıxıb: “Nasistlərə, banderovçulara, faşistlərə qarşı Ukraynada aparılan hərbi-siyasi əməliyyat artıq tammiqyaslı müharibəyə çevrilib. Hansı ki, bu müharibəni amerikalılar, NATO və birləşmiş Avropa elan edib. Müharibə və xüsusi əməliyyat bir-birindən köklü şəkildə fərqlənir. Xüsusi əməliyyatı elan etmisinizsə, onu dayandıra da bilərsiniz. Müharibəni isə istəsəniz də dayandıra bilməzsiniz. Sona qədər getməli olacaqsınız. Onunsa yalnız iki nəticəsi var: ya qələbə, ya məğlubiyyət”.

Qeyd edək ki, Xarkov istiqamətindəki biabırçı məğlubiyyətdən sonra Rusiyada müxtəlif səviyyələrdə Putinə qarşı etirazlar çoxalıb. Bu etirazlar həm müharibə əleyhinə olanlardan, həm də hakimiyyəti Ukraynaya qarşı daha sərt davranmağa çağıranlardan gəlir.

“AzPolitika.info”