SAĞLIĞINDA QİYMƏT VERƏK İNSANLARA!...

Eldar SABİROĞLU

Hərdən dünyasını dəyişmiş dostlar, dərin hörmət bəslədiyim insanlar gəlib yadıma düşür. İnanın, aləmim dəyişir, unudulmayan görüşlər, yaddan çıxmayan şirin və kədərli söhbətlər kino lenti kimi gözlərim önündə canlanır.

Arğısız keçmir keçmişin xatirələri, həm də yaman kövrəlirəm. Bu mənada iki gündür ki, Azərbaycanın Xalq şairi Cabir Novruzla bağlı xatirələrim məni dinc buraxmır...

C.Novruzla münasibətlərim, yaxından tanışlığım deputat olduğumuz illərdən başlamışdı. Çox zərif ürəyə, geniş qəlbə malik şəxsiyyət idi. Özgə dərdinə əlac edə bilməsə də, içinə salıb onunla yaşayan biri idi. Bəzən olurdu ki, MM-dən sonra çıxıb gedərdik dəniz kənarına... 

Demək olar hər gün imkansız adamlar Milli Məclisin kandarında dayanıb gündəlik çörək pulu üçün əl açardılar. O zaman vəziyyət cətin idi. Adamlar sanki öyrəşmişdilər Cabir müəllimə. Günlərin birində qapıdan çıxarkən 3 nəfər necə şığıdısa şairin üzərinə, bir anlığa təəccüblə üzümə baxdı. Eldar, dedi, cibimdə xırda yoxdur. Əlacsız əlini qoltuq cibinə salıb bir 50-lik çıxardı və qadınlardan birinə verdi, mən sənə inanıram, mağazalardan birində xırdalayın və ədalətli bölüşdürün. Bu sözünə güldüm və dedim ki, Cabir müəllim, son cümlən lap zəhmətkeşlər qarşısında çıxışa bənzədi. Özü ağır günlər keçirdiyindən, başqasının dərdini gözəl duyur və imkan daxilində köməyini əsirgəməzdi.

Mən onu belə tanıdım. Mərdlik, xeyirxahlıq, ədalətlilik prinsipləri onun təbiətindən gəlirdi. İnsanlara yalnız və yalnız gözəl günlər, işıqlı həyat arzuları ilə yaşayardı. Görünür, çəkdiyi kədər və qüssəli həyat, üç oğul balasını çox gənc ikən itirən atanı başqa kədərləri də özününkü kimi qəbul etməyə sövq etmişdir.

Oğlunun biri avtoqəza nəticəsində həlak olmuş, ikisi isə ürək infarktından vəfat etmişlər...

5 il bərabər bir yerdə siyasət apardıq, mən görmədim ki, kiminsə qəlbinə dəyəcək bir hərəkət etsin. Lakin kiçik oğlunun yas mərasiminə təkəm-seyrək yazıçı-şairlərin gəlişini görəndə məni dəhşət bürüdü.

Hərə 3 m. kəfənlə bu dünyadan gedəcək. Odur ki,"SAĞLIĞINDA QİYMƏT VERİN İNSANLARA!!!"

635x100

Şərhlər

emil 2023-01-05 12:18:41

Allah mushviqede rehmet elesin

t.ədalət 2022-12-07 12:27:34

Cabir Novruz "Bakı" qəzetində ədəbiyyat şöbəsinə başçılıq edən vaxtlar rayondan olan yaradıcı gənclərin göndərdiyi yazıları zibil qutusuna atırdı.Rayon camaatına qarşı genetik bir nifrət hissi var idi..

Atayev Fuad 2022-12-05 14:14:44

Allah rehmet elesin.Sizlerede can sagligi versin,sherefli insan,

Son yazılar