“Yaxın günlərdə Brüsseldə Avropa İttifaqı (Aİ) Şurasının prezidenti Şarl Mişel təşkilatçılığı ilə Ermənistan və Azərbaycan tərəflərinin iştirak edəcəyi görüşün keçirilməsi planlaşdırılır”.
“Report” “Sputnik-Armenia”ya istinadən xəbər verir ki, bunu ABŞ Dövlət Departamentinin sözçüsü Ned Prays gündəlik brifinqində deyib.
O, ABŞ-ın bu görüşdən nəticə gözlədiyini bildirib. N.Praysın sözlərinə görə, ABŞ Ermənistan-Azərbaycan danışıqlarına həddindən artıq nikbin yanaşmasa da, bu danışıqların keçirilməsini dəstəkləməyə çalışır.
“Biz çox nikbin olmağa çalışmırıq, lakin hərtərəfli həll istiqamətində bu dialoqu, bu diplomatiyanı dəstəkləməyə davam edirik”, - Dövlət Departamentinin sözçüsü əlavə edib.
Daha əvvəl ABŞ-ın dövlət katibi Entoni Blinken Azərbaycan Prezidenti İlham Əliyev və Ermənistanın baş naziri Nikol Paşinyan arasında danışıqlarda əhəmiyyətli irəliləyiş olduğunu açıqlamışdı.
“ABŞ bu prosesin davamlı olacağına ümid edir”, - N.Prays bildirib.
Xatırladaq ki, fevralın 18-də Münhen Təhlükəsizlik Konfransı çərçivəsində ABŞ-ın dövlət katibi Entoni Blinken, Azərbaycan Prezidenti İlham Əliyev və Ermənistanın baş naziri Nikol Paşinyanın iştirakı ilə üçtərəfli görüş keçirilib.
Şərhlər
A balam,bu görüşlər bitməyəcəkmi yəni?Otuz il görüşdük,danışdıq,söhbət elədik də,noldu axırı?İndi yenə başladıq?Vay dədəəə!Daha anadan əmdiyimiz süd burnumuzdan gəldi ki.A balam,nə qədər görüşərlər?Pay atonnan!Bizim yəni başqa dərdimiz-sərimiz yoxdumu?