Dələduzluqda ittiham olunan sabiq prokuror Mirələkbər Seyidovun cinayət işi üzrə məhkəmə istintaqı başa çatıb.
APA xəbər verir ki, Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən iclasda prokuror Valeh Ələkbərov çıxış edib.
Prokuror Mirələkbər Seyidovun verilmiş ittihamla təqsirli bilinməsini, cəzasını ümumi rejimli cəzaçəkmə müəssisəsində çəkməsi şərtilə 8 il azadlıqdan məhrum edilməsini istəyib.
Vəkillər müdafiə çıxışı üçün vaxt istəyiblər.
İttihama görə, Mirələkbər Seyidov Binəqədi rayon prokuroru olduğu müddətdə eyni rayonun hakimi Həsən Əliyevə özünü geniş əlaqələrə malik şəxs kimi təqdim edərək onu rayonlardan birinin məhkəməsinə sədr təyin olunacağına kömək edəcəyi barədə yalan vəd verib. O, bunun üçün sabiq hakimdən 200 min dollar pul alıb.
Bundan başqa, Mirələkbər Seyidov tanışı Tahir Hüseynovun 70 min dollar məbləğində pulunu dələduzluq yolu ilə ələ keçirib.
Qeyd olunan əməllərə görə Mirələkbər Seyidova qarşı Cinayət Məcəlləsinin 178.3.2 (külli miqdarda ziyan vurmaqla dələduzluq) maddəsi ilə ittiham irəli sürülüb, barəsində istintaq dövründə həbslə bağlı olmayan qətimkan tədbiri seçilib.
Mirələkbər Seyidov iş üzrə zərərçəkmiş Həsən Əliyevə dəymiş ziyanı ödəyib, tərəflər arasında barışıq əldə olunub. Digər zərərçəkmiş şəxsə dəymiş ziyan isə ödənilməyib.
Xatırladaq ki, həm sabiq prokuror Mirələkbər Seyidov, həm də zərərçəkmiş sabiq hakim Həsən Əliyev əvvəllər ayrı-ayrı işlər üzrə dələduzluqda təqsirli bilinərək məhkum olunublar.
Binəqədi və Ağdaş rayonunun prokuroru olmuş Mirələkbər Seyidovun işinə 2013-cü ildə Bakı Ağır Cinayətlər Məhkəməsində baxılıb. Ona şərti cəza verilib.
Sabiq hakim Həsən Əliyev isə 2014-cü ildə dələduzluq yolu ilə pul ələ keçirmə ittihamı ilə cinayət məsuliyyətinə cəlb olunub.
O, bundan sonra Prezidentin sərəncamı ilə Bakı Ağır Cinayətlər Məhkəməsinin hakimi vəzifəsindən azad olunub. Sabiq hakim 2015-ci ildə Gəncə Ağır Cinayətlər Məhkəməsinin hökmü ilə 7 müddətinə azadlıqdan məhrum edilib.
Şərhlər
Biri dələduz, bir də rüşvətxor. Bunu da müxalifətçilər demir ki. Göz qabağındadır. Bu milləti qabağına qoyub kimlər ağlasın, kimlər ağlaüsın?
Bu nə fırıldaqdırsa rüşvətə aid məcəllənin tələbi Azərbaycanda 50 faiz işləyir.Bu rüşvət verənin cəzasız qalmasının səbəbi nədir?Əgər qanun tam işləsə o zaman rüşvətxorluq bəlası bu qədər geniş yayılmazdı.Bəs bu hala gətirilməyinin kökü və səbəbi nədir?Sanki rüşvər verən məhkəmədə qəhtəmana çevrilir.Bu sistemin ayıbı deyilmi?
Bəs hakimdə 200 000 dollar haradandır? Nİyə bu hal araşdırılmayıb?Axı misal var:"oğrudan oğruya halaldır" O zaman prokurorla hakim eyni cəza almalıdır.Çünki rüşvət verən də qanunla cinayətkardır.i