Konstitusiya Məhkəməsi ipoteka krediti ilə bağlı qəbul etdiyi qərara aydınlıq gətirib

Son günlərdə Konstitusiya Məhkəməsi Plenumunun Mülki Məcəllənin 269.1, 269.5, 460.1 və 1306.1-ci maddələrinin əlaqəli şəkildə şərh edilməsinə dair aprelində 19-da qəbul etdiyi qərarında əks olunan hüquqi mövqelər cəmiyyətdə fərqli fikirlərin formalaşmasına səbəb olub.

Bu barədə "Report"un sorğusuna cavab olaraq Konstitusiya Məhkəməsinin Mətbuat Xidmətindən bildirilib.

"Bununla bağlı ilk növbədə qeyd etmək istəyirik ki, Bakı Apellyasiya Məhkəməsinin Konstitusiya Məhkəməsinə ünvanlanmış müraciətində qaldırılan məsələ əsas borcluya, borclu öldüyü təqdirdə isə onun vərəsələrinə qarşı tələb irəli sürülmədən ipoteka qoyana qarşı (əsas borclu və ipoteka qoyan fərqli şəxslər olduğu halda) ipoteka predmetinə tutmanın yönəldilməsi barədə qaldırılan iddiaların təmin edilib-edilməməsi ilə bağlı olub", - məlumatda qeyd edilib.

Konstitusiya Məhkəməsinin Plenumu qəbul etdiyi qərarda göstərib ki, “İpoteka haqqında” qanunun 48-ci maddəsində borclunun ölümü ipoteka müqaviləsinə xitam verilməsi əsası kimi nəzərdə tutulmadığından borclunun ölümü ipoteka müqaviləsinə münasibətdə hər hansı hüquqi nəticəyə səbəb olmur. Yəni borclu öldüyü halda da ipoteka müqaviləsi üzrə öhdəlik davam edir.

Qərarda o da qeyd olunub ki, Mülki Məcəllənin 1151.1-ci maddəsinə əsasən, mirasa (miras əmlaka) miras qoyanın öldüyü məqamadək malik olduğu əmlak hüquqlarının (miras aktivi) və vəzifələrin (miras passivi) toplusu daxildir. Yəni mirası qəbul etmiş vərəsələr miras qoyanın vəzifələrini (öhdəliklərini) də qəbul etmiş olurlar.

Sonda Konstitusiya Məhkəməsinin Plenumu qanunvericiliyin müvafiq normalarını nəzərə alaraq belə nəticəyə gəlib ki, əsas öhdəlik üzrə borclu (məsələn, kredit müqaviləsi üzrə borclu), o cümlədən sonuncunun ölümü halında vərəsələr öhdəliyi icra etmədikdə və ya lazımınca icra etmədikdə (əsas öhdəlik pozulduqda) kreditor ipoteka predmetinə tutmanın yönəldilməsi barədə iddia qaldıra bilər. Yəni öhdəlik pozulduğu halda əsas borcluya və ya vərəsələrə qarşı iddia qaldırmadan qanunvericiliklə müəyyən olunmuş qaydada ipoteka predmetinə tutmanın yönəldilməsi barədə tələb mümkün hesab edilib.

Nəzərə alınmalıdır ki, ipoteka hüququ kifayət qədər geniş anlayış olmaqla qanunvericiliklə nəzərdə tutulmuş əsaslar olduğu hallarda ipoteka saxlayanın ipoteka predmetinə tutmanın yönəldilməsi hüququdur. Müraciətdə şərh edilməsi xahiş olunan məsələ məhz İpoteka və Kredit Zəmanət Fondunun xətti ilə və ya digər şəkildə alınmış ipoteka krediti ilə əlaqəli olmamaqla ümumiyyətlə hüquqi kateqoriya kimi öhdəliklərin icrasının təmini üsulu olaraq ipoteka (girov) institutu ilə bağlıdır.

635x100

Şərhlər

dadaşyev 2023-05-27 08:03:05

Yüz anlaşılmaz izahdansa vərəsəlik haqqında qanuna bir tək maddə əlavə etmək yetərlidir.Məsəla,qanun çıxaraq ki,”İpoteka kreditini ödəmədən ölən adamın vərəsələrindən birisi də bankirdir”.Belə olanda çaşqınlıq yaranmaz və hər kəs bilər ki,ipotekanı bağlamadan ölən atadan iki dəst tuman-köynək qalıbsa bankirlə tən bölməlidir,çünki bankir də varisdir.Hər evin varisi.Bütün millətin varisi.Respublikanın yeraltı və yerüstü sərvətlərinin varisi.

Son yazılar