Mərhum yazıçı-publisist Rafiq Tağının işi Avropa İnsan Hüquqları Məhkəməsinə göndərilib.
Vəkil Elçin Sadıqov “Media forum” saytına belə deyib.
Rafiq Tağı 2011-ci il noyabrın 19-da Bakıda bıçaqlanıb və aldığı xəsarətlərdən noyabrın 23-də vəfat edib. İstintaqı aparan Baş Prokurorluğun Ağır Cinayətlərə Dair İşlər üzrə İstintaq İdarəsi 2014-cü il yanvarın 8-də cinayət işi üzrə icraatı dayandırıb. İstintaqın dayandırılması qərarından yerli məhkəmələrə verilən şikayət təmin olunmayıb.
Elçin Sadıqov deyib ki, Avropa Məhkəməsinə göndərilən şikayətdə Avropa İnsan Hüquqları Konvensiyasının 2-ci (yaşamaq hüququ), 6-cı (ədalətli məhkəmə araşdırması hüququ) və 10-cu (fikri ifadə etmək azadlığı) maddələrinin pozuntusunun tanınmasını xahiş ediblər: “Düşünürük ki, Avropa Məhkəməsi obyektiv qərar qəbul edəcək”.
Vəkil əlavə edib ki, istintaq dayandırılsa da, əməliyyat tapşırığı qüvvədədir: “Amma əməliyyat-axtarış tədbirlərinin necə getdiyi və nə dərəcədə yerinə yetirildiyi barədə məlumat verilmir. Yəqin ki, əməliyyat tapşırığı səmərəli formada yerinə yetirilmiş olsaydı, qətli törədən şəxsi tapmaq olardı”.
Şərhlər