“Vilnüs sammitində NATO-dan konkret addımlar gözləyirik” - Ukrayna rəsmisi

Milli Təhlükəsizlik və Müdafiə Şurasının katibi Aleksey Danilov bir neçə həftədən sonra Litvanın paytaxtı Vilnüsdə keçiriləcək NATO sammitindən gözləntiləri barədə danışıb.

“AzPolitika.info” xəbər verir ki, bu barədə Danilov iyunun 29-da öz “Twitter” səhifəsində yazıb.

Onun sözlərinə görə, Ukraynanın bu hadisədən böyük gözləntiləri var və dünya liderləri artıq Ukraynanın gələcəyi və onun Rusiya təcavüzündən qorunması ilə bağlı konkret bəyanatlar verməlidirlər.

“Budapeşt memorandumu”nun (1994-cü il) iflası, NATO-nun uğursuz Buxarest sammiti (2008-ci il) Rusiyanın Ukraynaya hücumunu təşviq etmək üçün ardıcıl addımlar idi”, - mesajda deyilir.

Aleksey Danilov həmçinin qeyd edib ki, dünya birliyi iki səhv edib və bu, genişmiqyaslı müharibəyə gətirib çıxarıb: “Üçüncüsü isə kritik olacaq. Tarix sübut edir ki, Ukraynanın təhlükəsizlik məsələləri həll olunmasa, dünyada sabitlik mümkün deyil, çünki Kreml gələcəkdə öz təcavüzünü təkrarlaya bilər”.

“Qarşıdan gələn Vilnüs sammitindən biz “anti-Budapeşt” üslubunda maksimum konkretlik gözləyirik”, – Aleksey Danilov bildirib.

Xatırladırıq ki, iyunun 28-də Estoniyanın Baş naziri Kaya Kallas Ukraynanın yeganə effektiv təhlükəsizlik təminatının NATO -ya üzvlük olduğunu və sammitdə Kiyev üçün açıqlamadıqları xüsusi sürpriz hazırladıqlarını bildirib.

Rüfət

AzPolitika.info