“Hərbi alyansın Ukraynaya qoşun yeritmək planı yoxdur”.
“AzPolitika” xəbər verir ki, bunu NATO-nun baş katibi Yens Stoltenberq “Associated Press” agentliyinə müsahibəsində Fransa Prezidenti Emmanuel Makronun bəyanatına münasibət bildirərkən deyib.
Stoltenberq vurğulayıb ki, NATO müttəfiqləri Ukraynaya görünməmiş dəstək verir. "Biz bunu 2014-cü ildən edirik və genişmiqyaslı işğal başlanandan sonra səylərimizi artırdıq. Amma hazırda NATO qoşunlarını Ukraynada yerləşdirmək planları yoxdur", - Şimali Atlantika Alyansının rəhbəri qeyd edib.
Bazar ertəsi 20-yə yaxın Avropa liderinin, həmçinin ABŞ və Kanada nümayəndələrinin Kiyevə yardımın artırılması variantlarını müzakirə etdiyi Paris görüşü öncəsi Slovakiyanın Baş naziri Robert Fico bildirib ki, bəzi dövlətlər ikitərəfli sazişin bağlanması çərçivəsində hərbi kontingentlərini Ukraynaya göndərmək barədə razılığa gəliblər.
Fico vurğulayıb ki, onun hökuməti belə bir dəstək təklif etməyi planlaşdırmır. Slovakiyanın Baş naziri hansı ölkələrin müvafiq sazişləri nəzərdən keçirə biləcəyi və ya qoşunlarının Ukraynada hansı vəzifələri yerinə yetirə biləcəyi ilə bağlı təfərrüatları açıqlamayıb.
Xatırladaq ki, Fransa Prezidenti Emmanuel Makron bazar ertəsi deyib ki, Rusiyanın tam miqyaslı işğalı üçüncü ildə davam etdiyi üçün Ukraynaya Qərb qoşunlarının göndərilməsi “gələcəkdə istisna edilməməlidir”.
Ertəsi gün belə planların olmaması ilə bağlı bəyanatlar - NATO rəhbərliyi ilə yanaşı ABŞ və onun Avropadakı əsas müttəfiqləri tərəfindən verilib. Ağ Ev bəyan edib ki, Vaşinqton öz quru qoşunlarını Ukraynaya göndərmək niyyətində deyil. Eyni zamanda, Prezident Co Baydenin administrasiyası yenidən Konqresi Kiyevə Ukrayna qoşunlarını müdafiəni davam etdirmək üçün lazım olan silah və sursatla təmin edəcək çoxmilyardlıq yardım paketini təsdiq etməyə çağırıb.
Almaniya, Böyük Britaniya, İspaniya, Polşa və Çexiya da Ukraynadakı müharibədə iştirak etmək üçün quru qoşunlarından istifadə olunması ilə bağlı variantı istisna ediblər. Almaniya kansleri Olaf Şolz fevralın 27-də deyib: “Ukrayna torpaqlarında nə Avropa ölkələri, nə də NATO dövlətlərinin əsgərləri olmayacaq”.
Fransa Prezidenti Makronun sözlərinə aydınlıq gətirən xarici işlər naziri Stefan Sejournet bildirib ki, dövlət başçısı minalardan təmizləmə, yerli sursat istehsalı və kibermüdafiə kimi konkret tapşırıqları yerinə yetirmək üçün qoşunların göndərilməsini nəzərdə tutur.
Rusiya Prezidentinin mətbuat katibi Dmitri Peskovun sözlərinə görə, Avropa İttifaqı və NATO öz əsgərlərini göndərmək qərarına gəlsələr, o zaman blokla hərbi münaqişə qaçılmaz olacaq. "Bu halda biz ehtimaldan yox, qaçılmaz toqquşmadan danışmalıyıq", - Peskov bildirib.
Rasim Əliyev
“AzPolitika.info”
Şərhlər