“ABŞ Mərkəzi Kəşfiyyat İdarəsi (MKİ) terror olaylarını və ya müharibələri əvvəlcədən necə proqnozlaşdıra bilir? MKİ dünyanın hər yerində geniş kəşfiyyat şəbəkəsinə malik olmaqla yanaşı müasir dinləmə texnologiyalarından istifadə edir”.
“AzPolitika.info” xəbər verir ki, bunu politoloq Elxan Şahinoğlu Moskvada baş verən terror hücumu ilə bağlı xəbərləri şərh edərkən deyib.
O, MKİ-nin Moskvadakı terror olayını əvvəlcədən müəyyənləşdirə bildiyini misal gətirir: “MKİ sadəcə, günü və terrorçuların Moskvada konkret hara hücum edəcəyindən xəbərsiz ola bilərdi. Ancaq terrorçu qruplaşmalardan birinin Moskvada artıq terror planlaşdırdığı barədə məlumatı olub. Bunu həm terrorçu təşkilatın içindəki MKİ xəfiyyəsi sızdıra, həm də təşkilat müxtəlif dinləmələr üzərindən terror hazırlığı qənaətinə gələ bilərdi. Eyni sözü müharibələr barədə də söyləmək olar”.
Politoloq 2020-ci ilin sentyabrında Azərbaycanla Ermənistan arasında müharibə başlamadan bir neçə gün öncə ABŞ-nin Bakıdakı və İrəvandakı səfirliklərinin öz vətəndaşlarını sərhəd bölgəsindən uzaq dayanmağa çağırdığını xatırladır: “MKİ əldə etdiyi məlumatlar və apardığı analiz üzərindən müharibənin başlayacağı qənaətinə gəlmişdi. Sadəcə sual olunur: Bu qədər imkanı olan Mərkəzi Kəşfiyyat İdarəsi necə olub ki, 2001-ci ilin sentyabrında terrorçuların “burnunun ucundakı” hücumlarını müəyyənləşdirib, qarşısını ala bilmədi? Bu mövzu ətrafında bu günə qədər qızğın müzakirələr gedir…”
Rasim
“AzPolitika.info”
Şərhlər