Xəbər verdiyimiz kimi, Hakim Yeni Azərbaycan Partiyası (YAP) partiyanın İdarə Heyətinin bu gün keçirilmiş iclasında 2024-cü il sentyabrın 1-də Milli Məclisə keçiriləcək növbədənkənar seçkilərdə namizədlərini müəyyənləşdirib.
"Azpolitika" xəbər verir ki, YAP-ın namizədliyini irəli sürdüyü şəxslər arasında dünən Oğuz rayon İcra Hakimiyyətinin başçısı vəzifəsindən azad edilən Eyvaz Qurbanov da var.
E.Qurbanovun 117 saylı Oğuz-Qəbələ seçki dairəsindən deputatlığa namizəd olacaq.
Qeyd edək ki, indiyə kimi 117 saylı Oğuz-Qəbələ seçki dairəsini parlamenmtdə YAP-ın üzvü Aqiyə Naxçıvanlı təmsil edib. O, dördüncü, beşinci və altıncı çağırış Milli Məclisinin deputatı olub.
Xatırladaq ki, E.Qurbanovun 117 saylı Oğuz-Qəbələ seçki dairəsindən deputatlığa namizəd olacağını "AzPolitika" xeyli müddət əvvəl məlumat vermişdi.
Eyvaz Daşdəmir oğlu Qurbanov 1963-cü il fevralın 14-də Oğuz rayonunun Bucaq kəndində anadan olub. 1980-ci ildə Oğuz şəhər 2 saylı orta məktəbini bitirib. 1981–1983-cü illərdə hərbi xidmətdə olub. 1984–1988-ci illərdə Azərbaycan Dövlət Bədən Tərbiyəsi İnstitutunda, 2001–2004-cü illərdə isə Azərbaycan Respublikasının Prezidenti yanında Dövlət İdarəçilik Akademiyasında təhsil alıb.
O, 1984–1999-cu illərdə Tofiq Bəhramov adına Respublika Stadionunun direktoru vəzifəsində işləyib. Azərbaycan Milli Olimpiya Komitəsinin üzvü olub. 2000-ci ildən Milli Olimpiya Komitəsinin Bakı Olimpiya Kompleksinin direktoru, 2005–2010-cu illərdə isə Oğuz-Qəbələ seçki dairəsindən Milli Məclisinin III çağırış deputat olub.
Azərbaycan Respublikası Prezidentinin 20 aprel 2011-ci il tarixli Sərəncamı ilə Oğuz Rayonu İcra Hakimiyyətinin başçısı vəzifəsinə təyin edilib.
16 iyul 2024-cü ildə icra başçısı vəzifəsindən azad edilib.
Şərhlər
İcra başçısı olub xalqa qənim kəsiləsən sonra da parlamentdə əyləşdiriləsən. Azərbaycanın dərdi yerə-göyə sığan dərd deyil.