Türkmənistanın Xalq Məsləhətinin sədri Qurbanqulu Berdiməhəmmədov ilə Əfqanıstan Nazirlər Kabinetinin sədri vəzifəsini icra edən Molla Məhəmməd Həsən Axund arasında görüş keçirilib.
Bu barədə “AzPolitika” Türkmənistan mediasına istinadla xəbər verir.
Görüşdə “Taliban” lideri Əfqanıstan və Türkmənistan arasında mehriban qonşuluq ənənələrinə əsaslanan əməkdaşlığın daha da möhkəmləndirilməsinin əhəmiyyətini vurğulayıb. Bildirib ki, Türkmənistan Əfqanıstanın ən yaxın qonşusu olmaqla dost ölkədə siyasi və iqtisadi sabitliyin təmin edilməsi üçün beynəlxalq səylərin inteqrasiyasının tərəfdarıdır və ona daimi yardım göstərir.
Qonaq vurğulayıb ki, əfqan və türkmən xalqları arasında çoxəsrlik əlaqələr hazırda keyfiyyətcə yeni səviyyəyə yüksəlir. Bununla əlaqədar Türkmənistan-Əfqanıstan sərhədində Serhetabat-Turğundi dəmir yolu keçidində yeni dəmir yolu körpüsünün açılışının, Serhetabat-Herat qaz kəmərinin və Serhetabat-Herat fiber-optik rabitə xəttinin tikintisinin, Turğundi dəmir yolu vağzalının quru limanında anbar kompleksinin tikintisinin, Turğundi-Sənabər dəmir yolunun tikintisinə başlanılmasının, eləcə də “Nur-əl-Cahad” elektrik stansiyasının istismara verilməsinin tarixi əhəmiyyəti olduğu bildirilib.
Qurbanqulu Berdiməhəmmədov istifadəyə verilən və təməli qoyulan obyektlərin ikitərəfli əməkdaşlığın tarixində yeni səhifə açdığını vurğulayıb. Əlavə edib ki, bu layihələrin uğurla həyata keçirilməsi iki ölkə xalqlarına xeyir gətirməklə yanaşı, regionda qonşu dövlətlərin sosial-iqtisadi inkişafına da töhfə verəcək.
SƏMLA
AzPolitika.info
Şərhlər