“2025-ci ildə buraxılış imtahanlarında iştirak edən orta statistik 11-ci sinif şagirdinin balı 132.33, 2024-cü ildə isə 132.09 olub. Bu mərhələdə toplanıla biləcək maksimal bal 300-dür”.

"AzPolitika" xəbər verir ki, bunu Dövlət İmtahan Mərkəzinin sədri Məleykə Abbaszadə bu gün keçirdiyi mətbuat konfransında bildirib.

DİM sədri, həmçinin gələcək imtahan iştirakçılarına davranış qaydalarına xüsusi diqqət yetirmələri ilə bağlı çağırış edib: “Bir daha imtahan iştirakçılarının nəzərinə çatdırırıq ki, qayda pozuntularına yol verən şəxslərin bütün nəticələri ləğv olunur və onlar ali və ya orta ixtisas təhsili müəssisələrinin müsabiqəsində iştirak etmək şanslarını itirirlər. Yəni qayda pozuntusuna yol verənlər qəbul imtahanlarının ikinci cəhdinə də buraxılmırlar, həmçinin onlar birinci mərhələnin (buraxılış imtahanının) nəticəsinə əsasən V ixtisas qrupunun müsabiqəsində iştirak hüququnu itirirlər”.

Məleykə Abbaszadə həmçinin bildirib ki, təhsil ekspertləri ali təhsil müəssisələrinə qəbul imtahanlarının qiymətləndirmə prosesində iştirak edə bilərlər.

O bildirib ki, bu prosesdə minlərlə müəllim iştirak edir: "Hər sualı 2 ekspert yoxlayır. 1 yazı işini 20 nəfər yoxlayır. 2 müəllimin qiyməti üst-üstə düşməyəndə yenidən yoxlanılır. Bu proses çox mürəkkəbdir.

Biz bu proseslərlə bağlı mediatur edəndə cəmi 2 ekspert gəlmişdi. Digərləri "Facebook"da tənqidi status yazmaqla məşğuldurlar.

Gələn ildən əsaslı olmayan şikayətlərə baxılmayacaq. Çünki bizim resursumuz gedir. Gələn ildən proses sərtləşdiriləcək. Həmin ekspertlər vicdanlı olmalıdırlar. Mən bilmirəm ki, onlara ekspert adını kim verib? Onlar haranı bitirib, beynəlxalq layihədə iştirak edibmi? Müəyyən qruplar var ki, məşhurlaşmaq üçün belə çıxışlar edirlər".