Ukrayna, Böyük Britaniya, Fransa və Almaniya ABŞ-ın müharibənin siyasi yolla həlli ilə bağlı planına qarşı cavab təklifi hazırlayırlar. 

“AzPolitika” bildirir ki, bu barədə “Reuters” agentliyi diplomatik mənbələrə istinadla məlumat yayıb.

Xəbərə görə, noyabrın 21-də Prezident Volodimir Zelenski müttəfiq ölkələrin liderləri ilə danışıqlar aparıb. Görüşdən sonra tərəflər bildiriblər ki, Avropa və ya NATO ilə bağlı istənilən saziş yalnız Avropa tərəfdaşlarının razılığı və müttəfiqlərin konsensusu ilə mümkündür. Agentlik qeyd edir ki, Vaşinqton öz planını hazırlayarkən Avropa ilə məsləhətləşməyib və Avropa ölkələri Kiyevə qəti dəstəyini nümayiş etdirib.

Avropa İttifaqının xarici siyasət rəhbəri Kaya Kallas da məsələ ilə bağlı sərt mövqe bildirib: “Hamımız istəyirik ki, müharibə bitsin, amma bunun necə bitməsi daha vacibdir. Rusiya işğal etdiyi dövlətdən hər hansı güzəşt tələb etmək hüququna malik deyil.”

Bununla yanaşı, Avropa rəsmiləri və diplomatları ABŞ-ın Rusiyanın dondurulmuş aktivlərini həll variantı kimi açmaq və həmin vəsaitin bir hissəsini — 100 milyard dolları — Ukraynanın bərpası üçün ABŞ-ın rəhbərlik etdiyi mexanizmə yönəltmək təklifini də tənqid ediblər. 

“Politico”nun məlumatına görə, xüsusi nümayəndə Stiv Uitkoffun təşəbbüsünə əsasən, bu prosesdən əldə olunacaq gəlirin 50%-i Vaşinqtona çatmalıdır. Mənbələr bunu Avropa İttifaqının həmin aktivlərdən “reparasiya krediti” üçün istifadə planlarına maneə kimi qiymətləndiriblər.

Avropalı diplomatlardan biri isə ideyanı sərt şəkildə “skandal” adlandırıb: “Avropalılar bu aktivlərin ukraynalıların maraqlarına uyğun istifadəsi üçün yollar axtarmaqdan tükəniblər, Tramp isə onlardan gəlir götürmək istəyir. Bu təklifin hamı tərəfindən rədd ediləcəyi demək olar ki, qaçılmazdır.”

AzPolitika.info