Görünməmiş yanacaq qıtlığı ilə üz-üzə qalan Rusiya vətəndaşları öz avtomobillərilə qonşu Qazaxıstandan benzin daşımağa başlayıblar. Rusiyalıların kütləvi şəkildə Qazaxıstanın həmsərhəd ərazilərindəki YDM-lərə axını ölkənin öz daxili bazarı üçün təhlükə yaratmağa başlayıb. Buna görə də Qazaxıstan hökuməti bu axının qarşısını almaq üçün müvafiq addımlar atmağa başlayıb.

“AzPolitika” xəbər verir ki, Qazaxıstan Daxili İşlər Nazirliyi ölkədən yanacaq və sürtkü yağlarının qanunsuz ixracının qarşısını almaq üçün nəqliyyat vasitələrinin sərhəd keçid məntəqələrində 59 polis postu yaradıb. Bu barədə rəsmi məlumat dərc edilib.

Məlumata görə, ilin əvvəlindən bəri Qazaxıstanda qanunsuz quraşdırılan əlavə yanacaq çənləri ilə işləyən 255 nəqliyyat vasitəsi aşkar edilib. Bütün qayda pozanlar inzibati cəzaya məruz qalıblar. Nəqliyyat vasitəsinin standart yanacaq çənindəki yanacaq istisna olmaqla, Qazaxıstandan yanacaq ixracı qadağandır.

4 iyulda Qazaxıstan hökuməti yanacaq ixracının qarşısını almaq üçün gecə-gündüz patrul xidməti tətbiq etdiyini açıqlayıb. Səyyar qruplar sərhəd yollarında maşınları yoxlayır. Eyni zamanda, maliyyə nazirinin müavini Yerjan Bijanov bildirib ki, iki gün ərzində sərhəddə əlavə çənlərdə və bidonlarda üç tondan çox yanacaq ixrac etmək üçün 61 cəhdin qarşısı alınıb.

Bundan əlavə, Qazaxıstan qonşu ölkələrdən gələn nəqliyyat vasitələri üçün sərhəd keçidlərini məhdudlaşdırıb: yük maşınlarına və minik avtomobillərinə artıq ölkəyə gündə bir dəfədən çox daxil olub çıxmaq qadağan edilib.

Energetika nazirinin müavini Kaiyrxan Tutkışbayev deyib ki, bu tədbir "yanacaq istehlakında tarazlığı qorumaq" məqsədi daşıyır. O qeyd edib ki, Rusiya ilə həmsərhəd olan Qərbi Qazaxıstan, Aktobe və Pavlodar vilayətlərində yanacaq istehlakı son zamanlar xeyli artıb və yanacaqdoldurma məntəqələrində növbələr yaranmağa başlayıb.

“AzPolitika.info”