Rusiya Konstitusiyasının müəlliflərindən biri olan Boris Ebzeyev vəfat edib.

“AzPolitika” xəbər verir ki, Rusiya MSK-sının mətbuat xidməti hüquq elmləri doktoru, professor, 2011-ci ildən 2026-cı ilə qədər Rusiya Mərkəzi Seçki Komissiyasının üzvü və Rusiya Konstitusiyasının müəlliflərindən biri olan Boris Ebzeyevin 76 yaşında vəfat etdiyi barədə rəsmi məlumat paylaşıb.

Bəyanatda deyilir: "Biz dövrlər arasında əlaqəni təcəssüm etdirən bir insanı itirdik: konstitusiya ədalətinin ilk addımlarından müasir seçki texnologiyalarına qədər".

Ebzeyev həmçinin Konstitusiya Məhkəməsinin hakimi və Rusiya Mərkəzi Seçki Komissiyasının üzvü idi.

Boris Səfəroviç Ebzeyev milliyətcə Qaraçay türküdür və 2008-ci ildən 2011-ci ilə qədər Qaraçay-Çərkəz Respublikasının Prezidenti olub.

30 oktyabr 1991-ci ildən 4 sentyabr 2008-ci ilə qədər isə Rusiya Federasiyası Konstitusiya Məhkəməsinin hakimi vəzifəsini daşıyıb. 14 mart 2011-ci ildən 30 mart 2026-cı ilə qədər Rusiya Federasiyası Mərkəzi Seçki Komissiyasının üzvü olub.

O, 25 fevral 1950-ci ildə Qırğızıstan SSR-in Frunze vilayətinin (indiki Qırğızıstanın Çuy vilayətinin Sokuluk rayonunun bir hissəsidir) Qızıl-Əsgər rayonunun Canı-Cer kəndində anadan olub. Ailəsi, digər qaraçaylılar kimi, 1943-cü ildə oraya sürgün edilib. 1957-ci ildə ailəsi ilə birlikdə vətəninə qayıdıb.


1972-ci ildə Saratov Hüquq İnstitutunu fərqlənmə diplomu ilə bitirib. 1990-cı ildə hüquq professoru olub. Onun tədqiqat maraqlarına konstitusiya hüququ, hakimiyyət, suverenlik, azadlıq və insan hüquqları məsələləri daxildir. 200-dən çox elmi məqalənin, o cümlədən 25 kitabın — monoqrafiyaların, dərsliklərin, elmi və praktik şərhlərin müəllifidir.

Ebzeyev 12 dekabr 1993-cü ildə qəbul edilmiş Rusiya Federasiyası Konstitusiyası layihəsinin və Qaraçay-Çərkəz Respublikasının Konstitusiyasının həmmüəlifidir.

Maraqlıdır ki, Boris Ebzeyev 2011-ci ildə, Dmitri Medvedevin vaxtında Qaraçay-Çərkəz Respublikası Prezidenti vəzifəsindən öz istəyi ilə istefa verib. Həmin vaxt o bəyan etmişdi ki, "Qaraçay-Çərkəzdəki sosial-iqtisadi vəziyyət ölkə prezidentinin qoyduğu tapşırıqları yerinə yetirmək üçün yetərli deyil”.

“AzPolitika.info”