Bugündən etibarən Azərbaycanda su obyektlərindən xüsusi məqsədlər üçün istifadəyə görə ödənişlərin tətbiqinə başlanılacaq.

"AzPolitika" xəbər verir ki, bu, Nazirlər Kabinetinin 14 aprel 2026-cı il tarixli 99 nömrəli qərarında nəzərdə tutulub. Qərar 2026-cı il sentyabrın 1-dən qüvvəyə minir.

Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətinin məlumatına görə, ödəniş hüquqi şəxslər və hüquqi şəxs yaratmadan sahibkarlıq fəaliyyəti ilə məşğul olan fiziki şəxslərin texniki qurğu və avadanlıq vasitəsilə su obyektlərindən su götürməsi, tullantı sularını su obyektlərinə axıtması və su akvatoriyasından istifadəsi hallarına şamil olunur.

Yeni qaydalara əsasən, sənaye məqsədilə Xəzər dənizindən götürülən hər 100 kubmetr su üçün 40 qəpik, çay və göllərdən götürülən eyni həcmdə su üçün 4 manat, yeraltı sulardan götürülən 100 kubmetr su üçün isə 40 manat ödəniləcək.

Çay və göllərdən kənd və meşə təsərrüfatı məqsədilə götürülən suyun hər kubmetri üçün 0,001 manat, balıqçılıq, o cümlədən akvakultura məqsədilə götürülən su üçün 0,0001 manat ödəniş müəyyənləşdirilib.

Yeraltı sulardan içməli su və məişət məqsədilə istifadəyə görə hər kubmetr üçün 0,1 manat, müalicə, kurort və sağlamlaşdırma məqsədilə 0,3 manat, sənaye məqsədilə 0,4 manat, balıqçılıq və akvakultura məqsədilə isə 0,0002 manat ödəniş nəzərdə tutulub.

Bununla yanaşı, tullantı sularının su obyektlərinə axıdılmasına görə də ödəniş tətbiq ediləcək. Sənaye məqsədilə Xəzər dənizinə axıdılan hər 100 kubmetr tullantı suyu üçün 1 manat, çay və göllərə axıdılan eyni həcmdə tullantı suyu üçün isə 4 manat ödəniləcək.

Beləliklə, yeni mexanizm ilk növbədə su obyektlərindən birbaşa istifadə edən sənaye müəssisələrinin, kənd və meşə təsərrüfatlarının, balıqçılıq və akvakultura təsərrüfatlarının, həmçinin müalicə-kurort fəaliyyəti göstərən sahibkarlıq subyektlərinin xərclərinə təsir edə bilər.

Xüsusilə yeraltı sudan sənaye məqsədilə istifadə edən müəssisələr üçün ödəniş digər su mənbələri ilə müqayisədə daha yüksək müəyyənləşdirilib. Məsələn, 10 min kubmetr yeraltı su götürən sənaye müəssisəsinin bu həcm üzrə ödənişi 4 min manat, eyni həcmdə çay və göl suyundan istifadə zamanı 400 manat, Xəzər dənizindən istifadə zamanı isə 40 manat təşkil edəcək.

Bu səbəbdən həmin xərclərin istehsal olunan məhsulların maya dəyərinə təsiri müəssisənin istifadə etdiyi suyun mənbəyindən və həcmindən asılı olacaq. Rəsmi sənədlərdə isə konkret məhsullar üzrə qiymət artımı və ya yeni ödənişin satış qiymətlərinə hansı həcmdə təsir edəcəyi ilə bağlı proqnoz göstərilməyib.

Məlumat üçün qeyd edək ki, su obyektlərindən xüsusi məqsədlər üçün istifadə etmək istəyən sahibkarlıq subyektləri əvvəlcə Azərbaycan Dövlət Su Ehtiyatları Agentliyinə müraciət etməli, müvafiq icazə aldıqdan sonra müqavilə bağlamalıdırlar.