ABŞ Prezidenti Donald Tramp CNN, MS NOW və "Politico" media qurumlarının Ağ Ev ərazisində fəaliyyətini qadağan etdiyini açıqlayıb. ABŞ Prezidenti bu media qurumlarını “saxta xəbərlər” yaymaqda ittiham edib və digər nəşrlərə qarşı da oxşar məhdudiyyətlərin tətbiq oluna biləcəyini bildirib.
"AzPolitika" xəbər verir ki, Tramp “Truth Social” platformasında yazıb ki, CNN, MS NOW və "Politico"nun Ağ Evə girişinə “saxta xəbərlər yaymaqda davam etdikləri üçün” qadağa qoyulur.
ABŞ Prezidenti bildirib ki, media qurumları onun administrasiyasını və ABŞ-ni işıqlandırarkən “uydurma və yalan məlumatlar yaymamalıdır”.
Daha sonra Oval kabinetdə jurnalistlərin suallarını cavablandıran Tramp qərarının səbəbini “saxta xəbərlərdən yorulması” ilə izah edib. Qadağaya konkret hansı materialların səbəb olduğu barədə sualı cavablandıran prezident bunun son bir neçə il ərzində yayımlanmış materialların məcmusu ilə bağlı olduğunu deyib.
Tramp qadağanın necə tətbiq ediləcəyinə dair konkret açıqlama verməyib.
"Reuters"in məlumatına görə, Ağ Ev sözügedən üç media qurumuna kompleksə girişin şənbə günündən etibarən dayandırılacağını bildirib.
CNN qərarla bağlı Ağ Evdəki jurnalist heyətinə tam dəstəyini ifadə edib. Şirkət fəaliyyətinin ədalətli və dəqiq olduğunu bildirib və ABŞ Konstitusiyasının Birinci Düzəlişinin jurnalistlərə hökumətin müdaxiləsi olmadan dövlət qurumlarının fəaliyyətini işıqlandırmaq hüququ verdiyini vurğulayıb. CNN mümkün qadağanı həmin hüququn qanunsuz şəkildə məhdudlaşdırılması kimi qiymətləndirib.
"Politico" da ABŞ prezidentinin və administrasiyasının fəaliyyətini işıqlandırmağa davam edəcəyini və Birinci Düzəlişlə qorunan hüquqlarını müdafiə edəcəyini açıqlayıb.
Nəşr, həmçinin Trampın ABŞ hökumətinin "Politico"ya abunəlik üçün qanunsuz şəkildə 8 milyon dollar ödəməsi ilə bağlı iddialarını rədd edib.
Tramp digər media qurumlarına qarşı da analoji addımların atıla biləcəyini istisna etməyib. Jurnalistlərlə söhbətində o, “The New York Times” və “The Washington Post” qəzetlərinin adını çəkərək onları da “saxta xəbər” yaymaqda ittiham edib.
Prezidentin qərarı mətbuat azadlığı və söz azadlığını təmin edən ABŞ Konstitusiyasının Birinci Düzəlişi baxımından hüquqi mübahisələrə səbəb olub. Bir sıra media qurumları və mətbuat azadlığı təşkilatları məhdudiyyətlərə məhkəmə yolu ilə etiraz etməyə hazır olduqlarını bildiriblər. "Associated Press" qeyd edib ki, tənqidçilər bu addımın media qurumlarının yayımladığı materialların məzmununa görə seçilməsi səbəbindən siyasi mövqe ayrı-seçkiliyi ilə bağlı suallar doğurduğunu deyirlər.
Tramp administrasiyası ilə media arasında bu, ilk qarşıdurma deyil. Administrasiya daha əvvəl "Associated Press"in Ağ Evin bəzi tədbirlərinə girişini məhdudlaşdırmışdı. Buna səbəb AP-nin Trampın təklif etdiyi “Amerikanın Meksika körfəzi” ifadəsindən istifadə etməkdən imtina etməsi olmuşdu. Associated Press isə tətbiq edilən məhdudiyyətlərə məhkəmədə etiraz etmişdi.
AzPolitika.info
Şərhlər