Ukraynanın şərqinə nəzarət edən Rusiya yönlü separatçılar ATƏT müşahidəçilərini Mariupol şəhəri yaxınlığındakı Şirokino qəsəbəsinə buraxmayıblar.
Bu barədə məlumatı ATƏT-in Ukraynadakı xüsusi monitorinq missiyasının rəhbəri Maykl Boçurkiv verib.
Son vaxtlar bu ərazidə toqquşmalar baş verdiyini həm separatçılar, həm də Ukrayna hökumət qoşunları bildirmişdilər.
Missiyanın rəhbəri bildirib ki, əvvəlcədən verilmiş vədə baxmayaraq separatçılar Şirokino qəsəbəsinə yoxlanış səfərlərinin keçirilməsinə mane olurlar.
Missiya həmçinin bildirir ki, separatçılar onların qarşısında havaya atəş açıblar.
Təhlilçilər separatçıların Mariupol yaxınlığındakı mövqelərdə təftişlərə maneçilik törətməsini narahatedici əlamət sayırlar. /Azadlıq radiosu
Şərhlər