Həsən Ruhani Türkiyə prezidentini Tehrandakı prezident sarayında qarşılayıb
Türkiyə prezidenti Rəcəb Tayyib Ərdoğanın İrana səfəri başlayıb. Anspress-in məlumatına görə, İran İslam Respublikasının prezidenti Həsən Ruhani Türkiyə prezidentini Tehrandakı Sadabad Sarayında qarşılayıb.
R.T.ərdoğanın şərəfinə fəxri qarovul düzülüb. İran və Türkiyə prezidentləri fəxri qarovulun önündən keçiblər.
Qeyd edək ki, İran prezidenti Həsən Ruhaninin rəsmi dəvəti əsasında reallaşdırılan səfərdə R.T.Ərdoğanı xarici işlər naziri Mövlut Çavuşoğlu, iqtisadiyyat naziri Nihat Zeybekci, gömrük və ticarət naziri Nurəddin Canıklı, enerji və təbii sərbətlər naziri Taner Yıldız, mədəniyyət və turizm naziri Ömər Çelik və inkişaf naziri Cevdet Yılmaz müşaiyət edirlər.
Türkiyədən İrana prezident səviyyəsində 4 il aradan sonra baş tutan ziyarətdə Türkiyə-İran Yüksək Səviyyəli İş Birliyi Şurasının ikinci toplantısı keçiriləcək. Həmçinin İranın dini lideri Ayətullah Seyyid Əli Xameneyi və prezident Həsən Ruhani ilə Tehranda görüş nəzərdə tutulur.
Görüşlərdə Türkiyə ilə İran arasında ikitərəfli əlaqələrin indiki vəziyyəti, eləcə də regional və beynəlxalq məsələlər barədə fikir mübadiləsi aparılacaq.
Şərhlər