2015-ci ilin birinci rübündə Azercell Telekom MMC-nin abunəçilərinin sayı 23 min və ya 6,1% azalıb. “Marja” Azercell-in əsas təsisçisi olan TeliaSonera-ya istinadən xəbər verir ki, 2015-ci ilin Mart ayının sonunda Azercell-in abunəçilərinin sayı 4 milyon 196 min olub.
Ötən ilin sonunda Azercell-in abunəçilərinin sayı 4 milyon 219 min, Mart ayının sonunda isə 3 milyon 955 min idi.
Məlumata görə, 2015-ci ilin birinci rübündə ötən ilin eyni dövrü ilə müqayisədə TeliaSonera-nın Azərbaycanda xalis satışları, İsveç kronunda ifadədə 14.1% artaraq 938 milyon İsveç kronu (SEK) (113 milyon manat) təşkil edib.
Birinci rübdə Azercell-in Faiz, Amortizasiya və Vergidən Öncəki mənfəəti (EBITDA) 14,2% artaraq 495 milyon İsveç kronu (59,6 milyon manat) təşkil edib. Şirkətin marjası 52.8% olub.
2014-cü ildə Azercell-in xalis satışları 3 milyard 778 milyon SEK ( hazırkı məzənnə ilə 455,2 milyon manat), EBITDA-sı isə 2 milyard 42 milyon SEK (246 milyon manat) təşkil edib. TeliaSonera-nın Azərbaycandakı satışları Azercell-in satışlarını əks etdirir.
2015-ci ilin birinci rübündə Azercell-in xalis gəlirləri yerli valyuatda 0.8 faiz azalıb. Azalma aşağı mesajlaşma gəlirləri ilə izah olunur.
Mobil operatorun data gəlirləri isə birinci rübdə 15 faizdən çox artıb.
Bu gün 1 İsveç kronu 0,1205 manata bərabərdir. İsveç kronu bu ilin fevralında 0.0932 manata qədər düşümüşdü.
Fevralda Azərbaycan manatı ABŞ dolları qarşısında 34 faiz ucuzlaşdırılıb.
Şərhlər