Müzəffər Baxışov: «Günah təsdiqlənsə, Azərbaycan hökumətinin borcudur ki, Elman Rüstəmovu məsuliyyətə cəlb edərək, cəzalandırsın»

Fevralın 17-də Avstriyanın paytaxtı Vyanada Mərkəzi Bankın sədri Elman Rüstəmovun adı keçən cinayət işi üzrə məhkəmə prosesinin başlayacağına dair ötən sayımızda məlumat vermişdik. Söhbət Avstriya Mərkəzi Bankının “Oesterreichische Banknoten-und Sicherheitsdruck GmbH” (OeBS) adlı törəmə şirkətinin Azərbaycan və Suriya üçün pul əskinaslarının çapına dair bu ölkələrdə müqavilələr bağlamaq üçün həmin dövlətlərin Mərkəzi bank rəhbərlərinə rüşvət verilməsindən gedir.

Yəni Azərbaycan və Suriya Mərkəzi banklarının rəhbərləri pul çapı üçün verdikləri sifarişə görə böyük məbləğdə maliyyə vəsaiti əldə ediblər. 2005-2011-ci illərdə Azərbaycan və Suriyanın Mərkəzi banklarının rəhbərləri - Elman Rüstəmov və Adib Mayale də daxil olmaqla, bu ölkələrin rəsmilərinə ümumilikdə 14 milyon avro məbləğində pul verilib. Konkret olaraq, bu ölkələrin pul çapı üçün ödədikləri vəsaitin Suriyaya 14, Azərbaycana isə 20 faizi qaytarılıb.

Avstriyada bu qalmaqalla əlaqədar 9 nəfər məsuliyyətə cəlb olunub. Onların arasında Avstriya Mərkəzi Bankının sədr müavini, bankın pul əskinaslarının çapı ilə məşğul olan bölməsinə rəhbərlik etmiş 63 yaşlı Volfqanq Duçazek də var. Əgər Avstriya məhkəməsi Mərkəzi Bankın rəhbərlərinin günahını sübut edərsə, o zaman onlar barəsində hansı qərarlar qəbul oluna bilər?

M.Baxışov "Azadlıq" qəzetinə bildirib ki, məhkəmə birbaşa E.Rüstəmov və Mərkəzi Bankın digər rəhbər şəxslərinə qarşı ittiham irəli sürməyib. Amma əgər məhkəmədə Mərkəzi Bankın rəhbərliyinin törədilən cinayətlərdə iştirakı təsdiqini taparsa, bunlar korrupsiya cinayətləridir: “Cinayət Məcəlləsinin 12.1-1 maddəsinə görə, əgər vətəndaşlarımız Azərbaycanın hüdudlarından kənarda törətdikləri korrupsiya və ya qulluq mənafeyi əleyhinə olan digər cinayətə görə xarici dövlətdə məhkum olunmayıblarsa, bu məsələ ilə bağlı cinayət məsuliyyətinə cəlb olunurlar. Yəni Mərkəzi Bankın Elman Rüstəmovun Avstriyada hər hansı bir şəxsə rüşvət verməsi faktı təsdiq olunacaqsa, o zaman Azərbaycan Cinayət Məcəlləsinin 312.2-ci maddəsinə - rüşvət vermə və ya təkrar rüşvət verməyə görə o, cinayət məsuliyyətinə cəlb olunmalıdır. Əgər təsdiq olunarsa ki, Elman Rüstəmov Avstriyada vəzifəli şəxslərlə birləşərək həm rüşvət verib, həm də dövlət əmlakını mənimsəmək məqsədilə 10 milyon artıq pul verərək, sonradan onun 5 milyonu da Mərkəzi Bankın rəhbərinə çatıb. Burada söhbət dövlət əmlakını külli miqdarda mənimsəməkdən gedir. Bu zaman Elman Rüstəmova Cinayət Məcəlləsinin 179.3.2-ci maddəsi ilə də ittiham verilə bilər. Buna görə də 7 ildən 12 ilə qədər azadlıqdan məhrumetmə cəzası nəzərdə tutulub. Bundan əlavə, Elman Rüstəmov rüşvətvermə maddəsinə görə iki min manatdan 4 min manata qədər cərimə və ya dörd ildən səkkiz ilə qədər azadlıqdan məhrum oluna bilər”.

M.Baxışov vurğuladı ki, E.Rüstəmov bundan əlavə 308.2-ci maddəsi ilə cinayət məsuliyyətinə cəlb edilə bilər. Buna görə də üç ildən səkkiz ilə qədər azadlıqdan məhrum edilə bilər. M.Baxışov onu da vurğuladı ki, istintaq zamanı vəzifə saxtakarlığı və digər faktlar üzə çıxa bilər. Bütün bunlara görə isə, E,Rüstəmov Cinayət Məcəlləsinin bir neçə maddəsi ilə cinayət məsuliyyətinə cəlb edilə bilər və cinayətlərin məcmusu qaydasında ona 15 ilə qədər azadlıqdan məhrumetmə cəzası təyin edilə bilər. “Avstriya məhkəməsi Mərkəzi Bankın rəhbərliyinin günahını sübuta yetirərsə, Azərbaycan hökumətinin borcudur ki, Elman Rüstəmovu məsuliyyətə cəlb edərək cəzalandırsın”, deyə M.Baxışov vurğuladı.