"İstəyirsə özünü lap damdan atsın. Mətbuat səhifələrində mənim şəxsiyyətimə yönəlik təhqirlərlə dolu məqalə dərc etdirən Elşad Məmmədovu məhkəməyə verəcəyəm. Qoy, bu məsələ hüquq müstəvisində həll olunsun. Yoxsa bu adam şantajlarından əl çəkməyəcək”.
Bunu “Yeni Müsavat”a “Avesta” konserninin prezidenti Hacı İbrahim Nehrəmli sahibkar Elşad Məmmədovun özünü yandıracağı xəbərinə münasibət bildirərkən deyib.
“Avesta” konserninin prezidenti eyni zamanda sahibkar Elşad Məmmədovla bağlı məsləyə bir daha aydınlıq gətirib: “51 və 52 saylı iki mənzilin Elşad Məmmədova satışı da məhz “Skat” restoranında görülən işlərin müqabilində həyata keçirilib. Bir müddət sonra məlum oldu ki, Orxan Sadıxovla birgə “Skat” restoranda heç bir iş görməyiblər. Buna görə də E.Məmmədovla bağlanmış müqavilənin ləğvini tələb etdim. Məhkəmə də öz növbəsində iddiamı təmin etdi. Elşad Məmmədov da mətbuatda dediyi kimi heç kimə pul verməyib, yalan danışır. “Xəzər Adaları”nda Orxanla birlikdə “Skat” restoranını götürüb iş görəcəkdilər. Müqavilədə imzaladıqları öhdəlikləri yerin yetirmədilər. Elə bildilər fırıldaq işlədib məni aldadıb, aradan çıxacaqlar. Ona mənzilin sənədlərini verməmişəm, kağız vermişdim ki, guya ödədilər. Bir də gördüm ki, Gürcüstana qaçıblar. Onları tutub gətirdilər. Baş Mütəşəkkil Cinayətkarlığa Qarşı Mübarizə İdarəsində ifadə aldılar. Şikayət etdi, məhkəmədə uduzdu. Bu dəfə də dinc dayanmadı, qəzetlərlə hücuma keçdi”.
Hacı İbrahim Nehrəmli bildirdi ki, biznesmenin özünü yandıracağı barədə mətbuata xəbərlər ötürməsi də, sadəcə diqqət çəkmək üçündür: “Deyir ki, guya mən pul verib aldığı mənzilləri onun əlindən almışam. Mənim buna nə ehtiyacım var axı. “Yeni Şəhər”də meqa proje həyata keçirirəm. Ev satıram. Mənim iki evə ehtiyacımmı var? Elşad Məmmədov özünü yandırmaq istəyirsə, yandırsın. Bu ölkənin qanunları var. Hamı o qanunlara tabe olmalıdır. Fırıldaqçılıqla heç kəs dövləti aldada, onun qanunlarını tapdalaya bilməz. Ona görə də qərar vermişəm ki, Elşad Məmmədovu şərəf və ləyaqətimi təhqir etdiyi üçün məhkəməyə verim. Qoy qanun qarşısında cavab versin”.
O, bildirib ki, “Avesta” konserninin sahibi Hacı İbrahim Nehrəmlini onun 355 min manat vəsaitini ələ keçirib. E.Məmmədovun sözlərinə görə, bu barədə işə hətta ayrı-ayrı məhkəmə instansiyalarında da baxılıb. Lakin hələ də pulunu geri ala bilməyən sahibkar artıq intihara əl atmaq zorunda qalıb.
O, bildirib ki, borc əlindən ailəsinin dolanışığını da təmin edə bilmir: “Əvvəllər xırda sahibkarlıqla məşğul idim. İndi əlimdə olan pulumu Hacı İbrahim Nehrəmlinin adamları aldığından borc aldığım adamların qarşısında girov qalmışam. Bilmirəm nə edim. Buna görə də çıxış yolunu intiharda görürəm”.
Qeyd edək ki, Hacı İbrahim Nehrəmlinin məsələyə "istəyirsə özünü lap damdan atsın" kimi münasibət bildirməsi təəssüf doğurur. Kimisə intihara təşviq etmək düzgün deyil. Hələ bu adamın adının qarşısında "hacı" sözü yazılırsa, heç düzgün deyil.
O ki qaldı pul məsələsində kimin haqlı olmasına, burda konkret fikir söyləmək, əlbəttə çətindir. Ancaq kimsə heç nədən başqasını pul mənimsəməkdə ittiham etməz. Özü də 355 min manatı. Deməli ortada nəsə var. Elə Hacı İbrahim Nehrəmli də təsdiqləyir ki, sahibkara pul ödədiyinə dair kağız verib. Əgər ödəniş olmayıbsa niyə belə bir kağız verirdi?
Bəlkə “Xəzər Adaları” kimi reallıqdan uzaq layihəni belə pullar hesabına həyata keçirir?
Vaqif
AzPolitika.info
Şərhlər