Rusiya Azərbaycanın strateji tərəfdaşıdır. Bu barədə Milli Məclisin spikeri Oqtay Əsədov bazar ertəsi bir qrup rusiyalı jurnalisti qəbul edərkən bəyan edib.
Bu barədə interfax.az-a istinadən xəbər verir.
“Rusiya Azərbaycanın strateji tərəfdaşıdır. İki ölkə arasında əməkdaşlığa dair 200-dən artıq saziş imzalanıb”, - deyə spiker qeyd edib.
Onun sözlərinə görə, Rusiya yeganə ölkədir ki, Azərbaycan onunla dövlət sərhədlərinin delimitasiya prosesini tam başa çatdırıb.
O qeyd edib ki, hər iki ölkə bir-birini bütün beynəlxalq təşkilatlarda dəstəkləyir, hərbi əməkdaşlığı uğurla inkişaf etdirir.
Spiker Azərbaycanda rus dilinə göstərilən qayğını qeyd edib və bu gün respublikada rus dilində 300-dən artıq məktəbin fəaliyyət göstərdiyini, bu dilin bütün ali məktəblərdə tədris olunduğunu vurğulayıb.
O.Əsədov Azərbaycanla Rusiya arasında iqtisadi münasibətlərin yüksək səviyyədə olduğunu bəyan edib və ölkələr arasında ticarət dövriyyəsinin 4 mlrd. dollar təşkil etdiyini deyib. Onun sözlərinə görə, Azərbaycanda Rusiyanın 500-dən artıq şirkəti fəaliyyət göstərir ki, bunun da 300-ü Rusiya kapitalına malikdir.
Şərhlər