Cəbrayıl rayon İcra Hakimiyyətinin başçısı Mahmud Quliyev sosial şəbəkədə yayılmış videosundan danışıb.
İcra başçısı lent.az-a açıqlamasında həmin videoda görüntülənən şəxsin özü olduğunu deyib: "Mən ora getmişdim, amma bilmirəm ki, orda kim qışqırır, kim-kimi söyür. Orda elə bir söyüş də olmayıb. Bir dənə “köpəkoğlu” sözü deyilib, vəssəlam. Öz qohumlarıma demişəm ki, “axmaq, köpəkoğlu, burda nə axtarırsan?” Orda heç camaat da yığışmamışdı. Öz qohumlarımdı, ərk edib demişəm. İçib piyan olub, kafedən çıxıb yığışmışdılar. Mən dünən səhərdən bu işlə məşğulam, Cəbrayıl sakinlərindən də soruşmuşam, hamısı deyir ki, onlar bizim öz uşaqlarımızdı. Heç bir təhqir olmayıb”.
M.Quliyev əlavə edib ki, rayonda qiymətlərin süni artımının qarşısının alınması istiqamətində tədbirlər görülür: “Dünən sahibkarlarla da profilaktik söhbət etmişik, süni qiymət artımına yol verməmələri tövsiyyə olunub. Dollarla gələn malın əlbəttə qiyməti qalxmalıdır. Kənd camaatının sahəsi var, malı var. Əkinlə-biçinlə məşğul olsunlar. Göy, soğan, kartof əksinlər. Mağazadan nə lazımdı ki? Bir dənə çay-qənddi də"
* * *
Mahmud Quliyev "Report"a müsahibəsində isə səsin ona məxsus olmadığını bildirib:
- O səs mənə məxsus deyil. Əslində məsələ başqa cür olub. Bir qrup adam yola yığışmışdılar. Həmin hadisədən əvvəl bizim sahibkarlarla görüşümüz olmuşdu. Həmin görüşdə mən özüm sahibkarla devalvasiya ilə bağlı söhbət aparmışam. Hər şey qaydaya düşmüşdü. Sonra mənə bildirdilər ki, orda-burda bəzi qüvvələr var və nəsə etmək istəyirlər. Onların hamısı alkaş, narkomandılar. Hardasa 15-20 adam var idi. Onlar mənim həmin yerə gəlməyimi tələb edirdilər. Mən də getdim, onları yoldan kənara çəkdim, söhbət etdik. Orada çox səmimi söhbət oldu.
Günel Mövlud adlı bir nəfər var. O, həmişə mənimlə bağlı həqiqətə uyğun olmayan, yalan məlumatlar yayır, yazılar yazır. Mən onun barəsində danışmaq istəmirəm. Qoy o, nə danışır danışsın.
- Sizin dediyiniz bu hadisələr nə vaxt baş verib?
- Bütün bu hadisələr yanvarın 13-də olub. Kimsə yazı yazırsa, məlumat yayırsa məsələni gərək yerində araşdırsın. İndi hamının əlində telefon var, götürüb çəkirlər, sonra da onu şişirdirlər.
Orda nə kimsə təhqir olunub, nə də bir adama artıq söz deyilib. Orda səmimi söhbət olub. Qammazın birinə demişəm ki, sən qədir bilən deyilsən, həmişə gəlib məndən pul alıb gedirsən, araq alıb içib camaatı təhqir edirsən. Bunu bir adama demişəm. Burda nə təhqir var? Mənim nə ixtiyarım var adamı təhqir eliyim? Deyir, söymə nökər dədəmi söyərəm bəy dədəni. Orda mən ancaq öz qohumuma demişəm ki, axmaq köpək oğlu burda nə axtarırsan..?
- Yəni o videodakı sözləri öz qohumunuza demisiniz?
- Bəli, öz qohumuma demişəm. Köpək oğlu bizdə adi söz sayılır.
Cəbrayıllıların aksiya keçirməsi, yol bağlaması haqda deyilənlər yalandır. Bunların hamısı dövlətə qarşı müxtəlif qüvvələrin törətdiyi təxribatıdır. Bunlar həmişə dövlətin yardımından yararlanıb, sonra dövlətə qarşı çıxan adamlardır. Onlar da öz paylarını almalıdır və aldılar da. Burada heç bir ajiotaj yoxdur.
- Deyirsiz ki, sizin fikirləriniz təhrif olunub. Hadisənin araşdırılması ilə bağlı rayonun hüquq-mühafizə orqanları araşdırma aparırmı? Bununla bağlı göstəriş vermisinizmi?
- Bütün hüquq-mühafizə orqanları ordadı. Orada iştirak edənlərlə səmimi söhbət aparılıb. Dövlətə qarşı çıxanlarla bağlı inzibati tədbir görüləcək.
- Həmin insanlarla yenidən görüşmüsünüz?
- Bu gün hamısını qəbul etmişəm. Gəlib üzr istədilər. Bildirdilər ki, səhv eləmişik. Bütün məsələləri yoluna qoyduq, orda iştirak edənlərdən biri Müsavat Partiyasının üzvü Vahid Əhməli idi. Gəldi üzr istədi, dedi ki, bir də belə səhv etməyəcəm. Sonra da çıxıb getdi.
Şərhlər