90 saylı Ağdaş seçki dairəsindən 6 nəfər deputatlığa namizədliyini irəli sürüb.
“Report”un xəbərinə görə, bunu Mərkəzi Seçki Komissiyasının (MSK) sədri Məzahir Pənahov deyib.
O bildirib ki, həmin şəxslərdən ikisi siyasi partiya - hakim Yeni Azərbaycan Partiyası (YAP) və Ümid Partiyasının nümayəndəsidir: “Digər 4 nəfər isə bitərəflərdir”.
Onlardan biri Respublikaçı Alternativ Hərəkatının sədri (REAL) İlqar Məmmədovdur.
Bu barədə REAL-ın icraçı katibi Natiq Cəfərli bildirib
“Dünən 90 saylı Ağdaş seçki dairəsindən xəbər verdilər ki, REAL sedri İlqar Məmmədovun sənədlərini qəbul ediblər və səlahiyyətli nümayəndə kimi məni DSK-ya dəvət etdilər. Bu gün Ağdaşda oldum, İlqar bəyin imza vərəqələrini aldım”,-deyə N.Cəfərli bildirib.
2013-cü il yanvarında İsmayıllıda baş vermiş kütləvi iğtişaşların təşkilində ittiham olunan İlqar Məmmədov hazırda həbsdədir. O, Şəki Ağır Cinayətlər Məhkəməsinin hökmü ilə 7 il müddətinə azadlıqdan məhrum edilib.
Qeyd edək ki, Prezident İlham Əliyevin sərəncamı ilə 90 saylı Ağdaş seçki dairəsi üzrə Milli Məclisə təkrar seçkilər 2016-cı il iyunun 18-nə təyin edilib.
Şərhlər