ANS Şirkətlər Qrupu prezidentinin media üzrə müşaviri Mais Məmmədov məlumatı təkzib etməyib.
Keçmiş əməkdaşlarını geri qaytarması barədə xəbərlər dolaşan ANS telekanalında daha iki istefa reallaşıb.
Ölkə.az-ın məlumatına görə, Səbinə Heydərova mart ayından işdən ayrılıb. İstefası daha böyük səs-küyə səbəb olacaq şəxs isə Sevda Həsənovadır (Böyük Seva).
Həsənova iyirmi illik iş yerindən Heydərova ilə eyni vaxtda gedib. Lakin istefalar mediadan ciddi cəhdlə gizlədilir. Bildirilir ki, hər iki şəxsin işindən ayrılmasına səbəb ANS Şirkətlər Qrupunun prezidenti Vahid Mustafayevlə münasibətlərinin pisləşməsidir.
Xatırladaq ki, Səbinə Heydərova ANS-in vitse prezidenti Mirşahin Ağayevin həyat yoldaşıdır.
ANS Şirkətlər Qrupu prezidentinin media üzrə müşaviri Mais Məmmədov məsələ ilə bağlı AzNews.az-a açıqlama verib. Bildirib ki, Sevda Həsənova ailəsində baş verən faciə səbəbindən işə çıxmır: “Onun atası rəhmətə gedib. Bununla bağlı olaraq işə çıxmır. Səbinə Heydərovayla bağlı isə heç bir bir məlumatım yoxdur”.
ANS-in vitse-prezidenti Mirşahin Ağayev həyat yoldaşı Səbinə Heydərovanın işdən çıxarılması ilə bağlı mətbuatda yayılan məlumatlara aydınlıq gətirib.
Mirşahin Ağayev azvision.az-a açıqlamasında haqqında yayılan məlumatlarla bağlı mətbuata geniş açıqlama verəcəyini bildirib. O, həyat yoldaşının işdən çıxarılması haqda məlumat yayan saytları məhkəməyə verəcəyini deyib.
“Bu xəbərlərlə bağlı geniş açıqlamam olacaq. Onu qeyd edim ki, bu məlumatları yayanları məhkəməyə verəcəyəm”.
Qeyd edək ki, ölkə.az saytının yaydığı məlumata görə, Mirşahin Ağayevin həyat yoldaşı Səbinə Heydərova ANS TV-dəki işindən ayrılıb.
ANS-in vitse-prezidenti Mirşahin Ağayev həyat yoldaşının telekanaldan ayrılması ilə bağlı yayılan xəbərlərə yenidən münasibət bildirib. “Qafqazinfo”ya açıqlamasında M. Ağayev bildirib ki, yayılan məlumatlar həqiqəti əks etdirmir:
“O məlumatı yayan mənbə hansı tula, hansı köpək, hansı itdirsə, yəqin ki, öz sahibinin əmrini icra edir. “ANS” Şirkətlər Qrupunun prezidenti Vahid Mustafayev, şirkətin baş direktoru Mirşahin Ağayev və onun ailəsi arasında guya hansısa narazılıqların olması barədə yanlış məlumatlar yaymaqla ölkənin ən nüfuzlu infomasiya strukturlarından birinin ətrafında mənfi əhval-ruhiyyə yaratmaq istəyirlər. Səbinə Heydərova hazırda analıq məzuniyyətindədir. Doğrudur, o, bir müddət efirdə “Baş xəbər” verilişinin aparıcı oldu, amma sonradan ailə vəziyyəti ilə əlaqədar analıq məzuniyyətini bərpa etmək qərarına gəldi. Bu gün də analıq məzuniyyətindədir. Vahid Mustafayevlə hər hansı bir mübahisənin olmasına gəlincə, o, “ANS” Şirkətlər Qrupunun prezidentidir, onunla yalnız yaradıcılıq mövzusunda müzakirə və mübahisə etmək olar. Digər bütün hallarda isə onun əmrləri müzakirə olunmur, icra olunur. Səbinə Heydərova da “ANS”ın çoxsaylı kollektivinin adi üzvlərindən biridir”.
Şərhlər