“İraq və Şamda İslam Dövləti” (DAİŞ) terror təşkilatı Suriya sərhədində yerləşən əl-Vəlid və İordaniya sərhədindəki Turəybil sərhəd-keçid məntəqələrini ələ keçirib.
SalamNews–un "əl-Ərəbiyyə" telekanalına istinadla verdiyi xəbərə görə, DAİŞ silahlıları sözügedən məntəqələrə hücumu İraq ordusunun İordaniya və Suriya ilə sərhəddə yerləşən əl-Ənbar əyalətinin şəhərlərindən çıxdığını bəyan etməsindən sonra həyata keçiriblər.
Bildirək ki, bundan əvvəl DAİŞ silahlıları İraq-Suriya sərhədindəki əl-Qaim və bu-Kəmal keçid məntəqələrini də nəzarətə götürüblər.
Yeri gəlmişkən, ötən gün hökumət ordusu ilə təşkilat üzvləri arasında qarşıdurmalar davam edib.
"SumariaNews"un məlumatına əsasən, dünən ordunun xüsusi təyinatlıları əl-Fəllucənin cənubunda DAİŞ-in 30 silahlısını öldürüb və onlara məxsus texnikanı sıradan çıxarıb.
Bundan başqa, silahlıların türkmənlərin yaşadığı Tələfrir şəhərini yenidən ələ keçirdikləri bildirilir.
Şərhlər