Demokratiya və İnsan Hüquqları Resurs Mərkəzi Avropa İnsan Hüquqları Məhkəməsinə göndərdiyi işlərin statistikasını açıqlayıb. Mərkəzin rəhbəri, vəkil Əsabəli Mustafayev “Media forum” saytına deyib ki, 2006-2014-cü illərdə Avropa Məhkəməsinə 225 iş üzrə şikayət göndəriblər: “Həmin şikayətlərdən 25-i təmin olunub və Azərbaycan dövləti 250 min avrodan artıq məbləğdə cərimələnib. 14 şikayət isə baxışa qəbul olunmayıb və geri qaytarılıb.
Çıxarılan qərarlarda Avropa İnsan Hüquqları Konvensiyasının 2-ci maddəsinin - yaşamaq hüququnun, 3-cü maddəsinin - işgəncə və qeyri-insani rəftarın qadağan edilməsinin, 5-ci maddəsinin - azadlıq və şəxsi toxunulmazlıq hüququnun pozulması, 6-cı maddəsinin - ədalətli məhkəmə araşdırması hüququnun və 11-ci maddəsinin - sərbəst toplaşmaq və yığıncaqlar keçirmək hüququnun pozulması halları təsdiqlənib. Qərarlarda Avropa Konvensiyasının 7 saylı protokolunun 4-cü maddəsinin - eyni əmələ görə iki dəfə mühakimə edilməyin qadağa olunmasının, 1 saylı protokolun 1-ci maddəsinin - mülkiyyət hüququnun pozulması halları da əks olunub”.
Mərkəz rəhbəri bildirib ki, Avropa Məhkəməsinə göndərdikləri işlərdən 12-si üzrə kommunikasiya xeyli əvvəl bitib və tezliklə qərarlar açıqlanacaq.
Mustafayevin sözlərinə görə, hazırda 40 şikayət üzrə Avropa Məhkəməsi ilə Azərbaycan hökuməti arasında intensiv kommunikasiya gedir: “Kommunikasiya mərhələsində olan işlərdən 25-i mitinqlərdə tutulanların, inzibati həbs cəzası alanların, polis və həbs yerlərində işgəncəyə, qeyri-insani rəftara məruz qalanların şikayətləridir. 9 iş isə “Azərenerji”Qapalı Səhmdar Cəmiyyətinin işə bərpa olunma ilə bağlı məhkəmə qərarını icra etməməsindən verilən şikayətlərdir. Digər şikayətlər mülkiyyət hüququnun pozulması və başqa hallarla bağlıdır”.
Şərhlər