Yüzlərlə silahlı "kadırovçu" Yamadayevlər ailəsinin evlərinə hücum edir

Hazırda Qudermesdə əsl hərbi əməliyyat gedir.

Virtualaz.org Rusiya KİV-ə istinadən bildirir ki, dörd yüz nəfər maskalı silahlı döyüşçü Yamadaevlərin böyük ailəsinin yaşadığı evləri hücumla götürməyə çalışırlar. Kamuflyajda olan silahlılar evlərə girir və hücumun səbəblərini izah etmədən insanları saxlayırlar.

Vəziyyətlə tanış mənbə "Rosbalt"a bildirib ki, silahlıların konkret hansı bölmələrdən olduğu bilinmir. Məlum olan yalnız odur ki, onlar Çeçenistan Respublikasının başçısı Ramzan Kadırovun nəzarəti altındadırlar.

Mənbə onu da istisna etmir ki, tezliklə guya hansısa çevrilişin və ya ona bənzər planın hazırlandığı barədə məlumat yayıla bilər.

Mənbə həmçinin xatırladıb ki, yayda Çeçenistanda respublikanın başçısı Ramzan Kadırova qarşı guya sui-qəsd hazırlanması işi üzrə şübhəli hökm çıxarılmışdı. İttiham edilən 3 nəfər daha əvvəl İsa Yamadayevin əhatəsinə daxil olub.