"Maliyyə nəzarəti sistemində vergi nəzarəti orqanlarının üzərinə böyük məsuliyyət düşür. Müasir dövrdə vergi siyasəti yalnız fiskal funksiyaları yerinə yetirmir, o, həm də iqtisadi inkişafın stimullaşdırıcı aləti kimi çıxış edir. Bu baxımdan vergi orqanlarının fəaliyyəti sahibkarlığın inkişafını dəstəkləməlidir. Vergi xidmətində peşəkar və təmiz kadrlara üstünlük verilməli, vergi əməkdaşlarının yüksək səviyyəli xidmət göstərməsi üçün onlara normal iş rejimi yaradılmalıdır". Bu fikirlər Prezident Administrasiyasının rəhbəri, akademik Ramiz Mehdiyevin “Prezident İlham Əliyevin iqtisadi strategiyasının əsas istiqamətləri” başlıqlı geniş məqaləsində yer alır. Məqalənin tam mətnini AzərTac dərc edib.
Administrasiya rəhbəri yazır ki, vergi sisteminə hörmət və inamın artırılması üçün ciddi addımlar atılmalı, vergiödəyiciləri ilə münasibətlər qarşılıqlı hörmət və etimada əsaslanmalıdır. Vergi uçotunun dəqiq aparılması, auditin real funksiyasının bərpa olunması, vergilərin yığılmasından vergilərin ödənilməsinə keçidin təmin edilməsi yeni mərhələdə vergi nəzarəti orqanlarının xüsusi diqqət yetirməli olduqları fəaliyyət istiqamətləri olmalıdır.
Ramiz Mehdiyev qeyd edir ki, maliyyə nəzarəti sistemində ölkənin iqtisadi sərhədlərini qoruyan gömrük orqanlarının da xüsusi yeri var.
Məqalədən sitat: “Mövcud qanunvericiliyə əsasən gömrük orqanları dövlət icra hakimiyyəti sistemində hüquq-mühafizə orqanı statusuna malik olsa da, onlar daha çox vergi və valyuta nəzarəti funksiyası daşıyırlar. Bu baxımdan Dövlət Gömrük Komitəsi özünün tənzimləyici və fiskal funksiyalarını digər maliyyə nəzarəti orqanları ilə uzlaşdıraraq həyata keçirməlidir».
Virtualaz.org qeyd edir ki, Ramiz Mehdiyevin bu tezisi Azərbaycanın gömrük orqanlarında gözlənilən instusional islahatların mesajı hesab edilə bilər. Belə ki, Dövlət Gömrük Komitəsi özünün tənzimləyici və fiskal funksiyalarını digər maliyyə nəzarəti orqanları ilə uzlaşdıraraq həyata keçirməli olduğu barədə tezis əslində Dövlət Gömrük Komitəsinin Maliyyə Nazirliyinə, yaxud Vergilər Nazirliyinə birləşdiriləcəyinə dair neçə vaxtdır dolaşan xəbərləri yada salır. Bir çox ölkələrdə gömrük xidməti ayrıca struktur deyil və digər maliyyə nəzarəti orqanlarının tərkibində departament kimi fəaliyyət göstərir.
Şərhlər
İnternetlə sifariş etdiyim bir neçə kiçik ölçülü veb kameranı Poçt Daşıma mərkəzinin Gömrük Məntəqəsi keçmiş MTN-in icazəsi olmaması bəhanəsilə mənimsəyib. Amma geri qaytardığını 5 ildir bildirir. Hanı bu geri qaytarılma barədə qərar? Mənim malımı hansı əsasla poçt geri qaytarıb və gömrüyün bu qərarına poçt cavabdeh deyil? Geri qaytarılıbsa, niyə malı göndərən şirkət ödədiyimiz pulu geri ödəməyib? İnternetlə sifariş olunan mal geri qaytarılırsa, avtomatik ödədiyimiz məbləğ hesabımıza geri qaytarılır. Deməli, mal geri qaytarılmayıb, sadəcə gömrük və poçt işçiləri tərəfindən mənimsənilib
İndiki mövcud Gömrük və vergi qanunvericiliyində rüsum və vergilərin tutulmasında ciddi dəyişiklik olmadan bu sahədə irəliləyiş gözləmək absurddur.İndiki mövcud qanunlara əsasən ödənişlər etdikdə sahibkar borçlu qalır və etdiyi əməliyyatlar ona heç bir gəlir yeri qoymur.Bu isə yüksək vəzifə tutmuş və monopolistlərin vergi və gömrükdən yayınmalarına stimul yaratdığına imkan vermək, azad sahibkarlara maneəə üçün hazırlanmış qanunardırın nəticəsidir.