Azərbaycanda kənd təsərrüfatı məhsullarının istehsalçıları öz məhsullarını evdən çıxmadan ölkənin istənilən nöqtəsində müştərilərə sata biləcək. Bunu “aqrar.az” onlayn platforması vasitəsilə etmək mümkün olacaq.
Layihənin rəhbəri Ülkər Seyidova Trend-ə bildirib ki, yeni yaradılmış portal kənd təsərrüfatı məhsullarının satışı prosesini mərkəzləşdirməyə və sadələşdirməyə imkan verəcək: “Sahibkarlar pulsuz qeydiyyatdan keçməklə məhsulların satışı barədə məlumatı şəkillərlə birlikdə yerləşdirə bilərlər. Satıcılar üçün məhsulun yerləşdirildiyi müddət ərzində qiyməti dəyişmək imkanı nəzərdə tutulub”.
Ü.Seyidovanın sözlərinə görə, saytda ilkin, emal olunmayan məhsul yerləşdirilir. Elanları ölkənin istənilən regionunun sakinləri yerləşdirə bilər.
O əlavə edib ki, layihə malların çatdırılmasını nəzərdə tutmayıb: “Logistika məsələləri ilə şirkətlər özləri məşğul olur, portalın əsas vəzifəsi isə alıcını satıcı ilə əlaqələndirməkdir”.
Şərhlər
Fermərlərin məhsullarını onlayn satmaq yox,Avsriyada olduğu kimi (Rayfazen)böyük anbar-soyuducuları olan tədarükçü dövlət firmaları yaradıb məhsulu almaq lazımdır.Kəndli ilə bazar arasında əlaqəni belə firmalar qurmalıdır.Bunun üçün hörmətli nazirimiz ətrafına,heç olmasa səriştəli kadrlar toplamalıdılr.Əlbəttə,alverçiləri yox!