HÜSEYN ABDULLAYEV İSTİNTAQLA ƏMƏKDAŞLIĞA GEDİB - Ona kömək edən məmurların adlarını açıqlayıb

Keçmiş deputat, hazırda həbsdə olan Hüseyn Abdullayevin həbsə 2-ci “gedişi” gözlənilməz olduğu kimi, özünün 4 divar arasındakı davranışları da heyrətamizdir. Hər halda, gələn məlumatlar, iddialar eks-deputatın “təki azadlığa buraxsınlar” istəyinin gerçəkləşməsi üçün nələrə hazır olduğunu ortaya qoyur. Əlbəttə ki, həbsə alınan hər kəs tezliklə azadlığa qovuşmasını istəyər, bu yolda addımlar atar və hərəkət edər. Hüseyn Abdullayevin bu yöndə hərəkətliliyi təqdirəlayiqdir. Lakin bir məqam var: o, azadlığa çıxmaq üçün vaxtilə ona gizlin kömək etmiş hər kəsi “körpü” etməklə buna nail olmağa çalışır.  

Belə iddialar var ki, Hüseyn Abdullayev həbsinin ilk günlərində üzləşdiyi rəftardan qurtulmaq üçün qazancı, anasının ölkədən çıxışına kimlərin kömək etməsi kimi məlumatları detallı şəkildə danışmağa qərar verib, Vergilər Nazirliyi, Sərhəd Qoşunlarındakı dostlarının adını çəkib. Həmin şəxslərin kimlikləri, vəzifələri müəyyən olunub və artıq onları işdən çıxarıblar. Son günlər bəzi dövlət idarələrində məmurların toplu halda işdən çıxarılmasının əsas səbəbi məhz Hüseyn Abdullayevin istintaqa açıqlamalarıdır.  Onların bəziləri rəsmən elan olunmadan, qanunauyğun şəkildə istintaqın xüsusi yoxlamalarından keçməkdədir.

Hüseyn Abdullayevin sərgilədiyi bu tövr onun özünə qarşı münasibətin bir qədər yumşaldılmasına, şəxsi xahişlərinin yerinə yetirilməsinə yol açıb. Hüseyn Abdullayevin belə xahişlərindən biri də xaricdə olan anasının ölkəyə qayıtmasına izn verilməsi ilə bağlı olub. Onun xahişi yerinə yetirilib. Hüseyn Abdullayevin anası artıq Azərbaycandadır.

Digər bir iddiaya görə isə Hüseyn Abdullayev Azərbaycanda Qərbin işlədiyi şəxslərlə bağlı da bildiklərini istintaqa deyib və “yadına düşdükcə” deməkdədir.

Musavat.com-a bəlli olub ki, Hüseyn Abdullayev istintaqa Azərbaycan hakimiyyəti əleyhinə iş aparan kampanyon və tərəfdarlarının da adlarını açıqlayıb. Üstəlik, o, Avropadakı bir neçə səfirimizlə gizli əlaqələri ilə bağlı da ifadə verib. İşin bir ucunun Moskvadakı milyarder “narazılarla”, o cümlədən də Abbas Abbasovla bağlı olması barədə də iddialar var. İstintaq hazırda tutuqlunun verdiyi bu məlumatların nə dərəcədə həqiqət olduğunu araşdırır. Tamamilə mümkündür ki, Hüseyn Abdullayev bazarlıq imkanlarının və güzəştlərin yüksək olması naminə əlaqələri haqda məlumatları şişirtsin.

Arestant özünün Avropadakı biznesi haqda da bütün suallara cavab verib, iddialara görə, xaricdəki (Almaniya, Avstriya, Türkiyə) aşkar-gizli mal varlığının “bəyannaməsi”ni ortaya qoyub. Məlum olduğu kimi, Hüseyn Abdullayev Azərbaycanda qanunsuz yollarla böyük sərvət əldə edib və həmin sərvətin təxminən 100 milyon dollar ekvivalentini ölkəmizdən xaricə çıxartmağa nail olub. Avropaya sığınan kimi də həmin vəsaitləri Azərbaycanın indiki iqtidarına və prezidentə qarşı çirkli kampaniyaları, informasiya müharibəsini maliyyələşdirməyə yönəldib.

Musavat.com-a bəlli olub ki, Hüseyn Abdullayevin Azərbaycanda və ondan kənarda maliyyə dəstəyi verdiyi jurnalistlərin və media quruluşlarının adları da istintaqa bəlli olub. Son günlər yayımı məhdudlaşdırılan və barələrində cinayət işi açılan media quruluşlarından bir neçəsi də (əsasən müxalif və reket təbiətlilər) bu cür gizli yardımların əhatəsinə düşənlərdəndir. Görünür, onlar son Gəncə hadisələrindəki davranışları ilə limiti doldurublar, buna görə də iqtidar belə sərt addımlara gedir...

Lakin Hüseyn Abdullayevin əlində ciddi bir “kozır” da var. Çox qəribədir ki, Avropa təsisatlarından bəziləri onu qorumaq təşəbbüsləri göstərirlər. Məsələn, onun deputat mandatının  ləğvi ilə bağlı Avropa İnsan Haqları Məhkəməsinin çıxardığı və icra olunmamış qərar yenidən hərəkətə gətirilib. Hüseyn Abdullayev istintaqla anlaşıb, imtinaya getməsə, analoquna nadir rastlanan həmin qərar icraya yönəldilə bilər. “Quska”nın bu “kozır”dan necə istifadə edə biləcəyi hələlik məlum deyil...

Qeyd edək ki, Hüseyn Abdullayev aprelin 22-də Türkiyədə yaxalanaraq Azərbaycana gətirilib. O zaman ölkəni silkələyən bu həbs haqda Vergilər, Daxili İşlər Nazirlikləri və Baş Prokurorluğun mətbuat xidmətləri birgə məlumat yaymışdılar. Orada vurğulanırdı ki, Vergilər Nazirliyi tərəfindən aparılmış səyyar vergi yoxlaması nəticəsində “Araz İNC” MMC-də 1 milyon 436 min manat məbləğində vəsaiti dövlət büdcəsinə ödəməməsi faktı üzrə 7 iyun 2013-cü il tarixdə Cinayət Məcəlləsinin 213.2.2-ci (vergi ödəməkdən yayınma) maddəsi ilə cinayət işi başlanıb. 3 oktyabr 2016-cı il tarixdə H.Abdullayevə ümumilikdə 1 milyon 810 min manat məbləğində vergiləri dövlət büdcəsinə ödəməkdən yayındırması və xüsusi razılıq (lisenziya) tələb olunduğu halda belə razılıq almadan tikinti-quraşdırma işlərini həyata keçirərək 966 min manat məbləğində gəlir əldə etməsinə əsaslı şübhələr müəyyən edildiyindən Cinayət Məcəlləsinin 192.2.2 (qanunsuz sahibkarlıq) və 213.2.2-ci maddələri ilə yenidən ittiham elan edilməsi barədə qərar çıxarılıb.

Bundan başqa, ayrı-ayrı vətəndaşların Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə daxil olmuş müraciətləri əsasında 14 fevral 2018-ci il tarixdə başlanmış cinayət işi üzrə H.Abdullayevin 2006-cı ildən 2018-ci ilədək olan müddət ərzində faktiki nəzarət etdiyi “Araz-İnşaat” ASC-də onun tapşırığına əsasən müəssisənin idarə olunmasını həyata keçirən Babayev Namiq İsmixan oğlu və qeyriləri ilə qabaqcadan əlbir olan bir qrup şəxs halında cəmiyyətə məxsus obyektləri müxtəlif vaxtlarda ayrı-ayrı şirkətlərə icarəyə verərək ümumilikdə 1 milyon 374 min manat məbləğində gəlirlərin cəmiyyətin kommunal xidmət və sair xərclərinin ödənilməsinə sərf olunmasına dair digər səhmdarlara yalan məlumat verməklə 13 min 373 manat məbləğində dividentləri vahid qəsdlə ələ keçirib zərərçəkmiş şəxslərə xeyli miqdarda maddi ziyan vurmaqla dələduzluq etməsinə şübhələr müəyyən edilib.

Eləcə də H.Abdullayevin dəfələrlə N.Babayev vasitəsilə, daha sonra isə Almaniyadan istifadəsində olan telefondan “Autist Uşaqların Reablitasiyasına Kömək” İctimai Birliyinin sədri Elnur Məmmədova zəng edərək onun və ailə üzvlərinin ünvanına nalayiq ifadələr işlədib tələblərinə əməl etməyəcəyi halda onları məhv edəcəyi ilə hədələyərək icarə müqaviləsi şərtlərinə görə hər ay ödəməli olduğu 3 min manat icarə haqqı əvəzinə onun nümayəndələrinə 6 min manat pul ödəməsini hədə-qorxu ilə tələb etməsinə əsaslı şübhələr müəyyən edildiyindən o, Cinayət Məcəlləsinin 178.2.1 (dələduzluq), 178.2.2, 178.2.4, 182.2.1 (hədə-qorxu ilə tələb etmə), 182.2.2 və 182.2.4-cü maddələri ilə təqsirləndirilən şəxs qismində cəlb edilməklə həmin maddələrdə nəzərdə tutulmuş ittiham elan edilib(musavat.com).