"Bir milyon dolları ölkə ərazisinə necə keçirmisiniz?" - Karine Mixaylovnanın ittihamına cavab

Təxminən bir ay əvvəl saytımızda Rusiya vətəndaşı Aqapova Karine Mixaylovnanın Rusiya Prezidenti Vladimir Putin, Azərbaycan Prezidenti İlham Əliyev, Birinci vitse-Prezident Mehriban Əliyeva, DİN başçısı Ramil Usubov və digərlərinə ünvanlanmış məkrubu dərc olunmuşdu.

Məktubunda K.Aqapova Bakıda azərbaycanlı həyat yoldaşının yaxın qohumu tərəfindən aldadılaraq, 1 milyon dollar pulunun mənimsənildiyini iddia edirdi.

"Mən, həm Rusiya vətəndaşıyam, həm də Azərbaycan. Həyat yoldaşım Əliyev Ələddin Kamil oğlu oğlu ilə neçə illərdir ki, Abşeronda bağ evi almaq arzusunda idik. Bu məqsədlə Moskva vilayətində bizə məxsus olan torpaq sahəsini 33.700.000 rubla, yəni 1 milyon ABŞ dollarına satmalı olduq.

Həyat yoldaşımın yaxın qohumu Əliyev Nəcəf Alim oğlu bütün bunlardan məlumat əldə edən kimi dərhal bizimlə görüşərək, bağ evi yox, gəlirli iş sayılan aptek almağı məsləhət bildi və bu işdə bizə yaxından köməklik edəcəyini öhdəsinə götürərək, 1 milyon dollarımızın ona etibar edilməsini xahiş etdi. Biz, ona inanaraq, 2012-ci ilin dekabr ayının 13-də yazılı iltizamnamə almaqla, əlimizdə olan 1 milyon dolları son qəpiyinədək ona verdik.

Elə həmin vaxtdan bu günə qədər o, nə pulumuzu qaytarır, nə də obyektimizi verir. Görünən budur ki, bu dələduz yüksək dairələrdə kiminsə çətiri altındadır”- deyə şikayət məktubunda bildirirdi.

Bu şikayətlə bağlı həmin vaxt Nəcəf Əliyevin mövqeyini öyrənməyə çalışsaq da, o zənglərimizə cavab verməmişdi. Ancaq dünən saytımıza müraciət edərək, K.Aqapovanın haqqında səsləndirdiyi iddiaların yalan olduğunu bildirib. Onun mövqeyini də hər hansı şərh vermədən dərc edirik:

"Bildirirəm ki, Rusiya vətəndaşı Aqapova Karine Mixaylovna sizin sayta müraciət edərək, guya onun 1 (bir) milyon ABŞ dolları pulunu ələ keçirməyimi ictimailəşdirmişdir. Bununla bağlı qeyd edirəm ki, Karine Mixaylovnanın dedikləri tamamilə əsassız olmuşdur. Onun dediklərinin əsassız olması istintaq orqanı tərəfindən aparılmış araşdırma ilə də öz təstiqini tapmışdır. Karine Mixaylovnaya sual olunur ki, ölkə ərazisinə Rusiya Federasiyasından bir milyon ABŞ dolları pulu necə və hansı yolla keçirtmisiniz? Dövlət Gömrük orqanlarına həmin pulu bəyan etmisinizmi?

Azərbaycan Respublikası Cinayət Məcəlləsinin 206-cı maddəsinə əsasən, yəni Azərbaycan Respublikasının gömrük sərhədindən gömrük nəzarətindən kənar və ya ondan gizli, yaxud sənədlərdən və ya gömrük eyniləşdirilməsi vasitələrindən aldatma yolu ilə istifadə etməklə, yaxud bəyan etməməklə və ya düzgün bəyan etməməklə malların və digər əşyaların külli miqdarda keçirilməsi qaçaqmalçılıq cinayəti hesab edilməklə 5 il müddətinə azadlıqdan mərhumetmə cəzası ilə cəzalandırılmalıdır.

Mən bu məsələləri araşdırılması üçün Dövlət Gömrük Komitəsinin aidiyyəti qurumlarına da yaxın günlərdə müraciət ünvanlayacağam. Hesab edirəm ki, Karine Mixaylovnanın Sizə müraciət etməsinin, bu məsələni ictimailəşdirməsinin səbəbi istintaq orqanının qanuni, əsaslı qərarına qanunsuz müdaxilə və təsirdən ibarətdir".

AzPolitika.info