"Qarabağda vəziyyət həqiqətən də gərgin və qeyri-sabitdir" - Kreml

Əliyev, Putin və Sarkisian Soçidə sambo yarışına birlikdə baxmağa gedəcəklər

Rusiya prezidentinin mətbuat katibi Dmitri Peskov deyib ki, Azərbaycan, Ermənistan və Rusiya prezidentləri qeyri-formal olaraq avqustun 9-da axşam da görüşə bilərlər.

Onun sözlərinə görə, Əliyev, Sarkisian və Putin Beynəlxalq sambo yarışlarına baxmağa gedəcəklər.

“Platforma S-70” adlı döyüş sambosu yarışlarına Putinin gəlişi artıq ənənəyə çevrilib. Peskov deyib ki, Azərbaycan və Ermənistan prezidentlərinin də ona qoşulacağı gözlənilir.

Azadlıq Radiosunun məlumatına görə, Putinin mətbuat katibi Dmitri Peskov avqustun 9-da jurnalistlərə deyib ki, “Biz prezidentlərin 3-tərəfli görüşünün sabah- avqustun 10-da gündüz keçiriləcəyini istisna etmirik”.

Peskov Qarabağdakı vəziyyət haqda isə deyib: “Vəziyyət doğrudan da gərgindir, qeyri-sabitdir. Ona görə də danışıqlar cəhdləri olunur”.

Avqustun 9-da Soçidə Putin Sarkisianla görüşdən əvvəl Azərbaycan prezidenti İlham Əliyevlə təkbətək görüşüb.

Görüş Rusiya prezidenti Vladimir Putin-in təşəbbüsü ilə keçirilir.

ATƏT-in Minsk Qrupunun həmsədrləri bu görüşə qatılmayacaqlar.

İyulun 31-dən bəri Azərbaycan-Ermənistan sərhədində və qoşunların təmas xəttində atəşkəs ardıcıl olaraq pozulur, hər iki tərəf itki verir, yaralananlar var.

Yerli və xarici ekspertlər Qafqazda yeni müharibə təhlükəsindən yazırlar.