Müdafiə Sənayesi Nazirliyinin mətbuat xidmətinin rəhbəri Şəfəq Kərimli öz ərizəsi ilə işdən çıxıb.
Bu barədə Şəfəq Kərimlinin özü "AzPolitika"ya açıqlamasında bildirib. O təxminən bir ay əvvəl işdən çıxmaq istədiyinə dair ərizə verdiyini vurğulayıb.
Ərizəsini nəzərə alaraq da Müdafiə Sənayesi naziri Mədət Quliyev onun vəzifəsindən azad olunmasınsa dair müvafiq əmr imzalayıb...
Nazirliyin sözçüsü vəzifəsi isə İnformasiya texnologiyaları şöbəsinin müdiri Yaşar İsakova həvalə olunub.
Qeyd edək ki, "report"un məlumatına görə, bu ilin iyun ayında Müdafiə Sənayesi Nazirliyinin Aparat rəhbəri Üzeyir İsmayılov da vəzifəsindən azad olunub və müvafiq əmrlə bu vəzifəyə Zaur Əliyev təyin edilib. Həmçinin Müdafiə Sənayesi nazirinin müavini Tofiq Rəfiyev də vəzifəsindən azad olunub. Eyni zamanda Müdafiə Sənayesi Nazirliyində struktur dəyişikliyi aparılıb və yeni kadr təyinatları olub.
Belə ki, nazirliyin Hüquq-müqavilə və kadrlar şöbəsi ləğv edilib. Onun əsasında iki yeni şöbə - Hüquq şöbəsi və Kadrlar şöbəsi yaradılıb. Müvafiq əmrlə Hüquq şöbəsinin müdiri vəzifəsi İsmayıl İbrahim oğlu Kərimova, Kadrlar şöbəsinin müdiri vəzifəsi isə Elgün Bəkir oğlu Bəxtiyarova həvalə olunub. İ.Kərimov bundan əvvəl Nazirliyin Hüquq-müqavilə və kadrlar şöbəsinin rəhbəri vəzifəsində çalışıb. Bundan başqa, Müdafiə Sənayesi Nazirliyinin Maliyyə və mühasibat uçotu şöbəsinin adı dəyişdirilərək Maliyyə və uçot şöbəsi adlandırılıb. Nazir M.Quliyevin müvafiq əmri ilə Nadim Buludxan oğlu Bayramov MSN-nin Maliyyə və uçot şöbəsinin müdiri təyin edilib.
Xatırladaq ki, Prezident İlham Əliyevin 20 iyun 2019-ci il tarixli sərəncamı ilə general-polkovnik M.Quliyev Dövlət Təhlükəsizliyi Xidmətinin rəisi vəzifəsindən azad edilərək Müdafiə Sənayesi naziri təyin olunub.
Şərhlər
MSN-nin Təhlükəsizlik və Mühafizə İdarəsində də struktur dəyişikliyi aparılmalıdır.Bu idarənin işçiləri mühafizə etdikləri müəssisələrin işçiləridir və oradan əməkhaqqı alırlar.Əmr və göstərişlər isə Təhlükəsizlik və Mühafizə İdarəsindən gəlir.