Azərbaycan qazının Türkiyəyə və buradan Avropaya nəqli üçün inşa edilən Trans-Anadolu Təbii Qaz Boru Kəmərinin (TANAP) səhmdarları layihənin işlənilməsindən illik 1,45 mlrd. dollar gəlir əldə edəcək.
“Report”un məlumatına görə, bunu bu gün İstanbulda keçirdiyi mətbuat konfransında TANAP-ın Baş direktoru Saltuk Düzyol bildirib.
Onun sözlərinə görə, bu gəlirin 58%-i Azərbaycanın payına düşəcək.
Qeyd edək ki, TANAP layihəsində “Cənub Qaz Dəhlizi” QSC 51%, Azərbaycan Dövlət Neft Şirkətinin (SOCAR) Türkiyədəki törəməsi “SOCAR Turkey Enerji A.Ş” 7%, BOTAŞ 30%, BP 12% paya malikdir.
Cənub Qaz Dəhlizi layihəsinin bir hissəsi olan TANAP Türkiyənin Gürcüstanla sərhəddindən başlayır və Yunanıstan sərhəddində, Ədirnənin İpsala rayonunda Avropa ölkələrinə təbii qaz nəqlini həyata keçirəcək Trans-Adriatik Boru Kəmərinə (TAP) birləşdirilir.
Ümumi uzunluğu 1 850 km olan TANAP Faza-0 və Faza-1 hissə olaraq həyata keçirilir. Boru kəmərinin Faza-0 adlandırılan Gürcüstan-Türkiyə sərhəddi-Eskişəhər hissəsinin diametri 56 düym, uzunluğu 1 340 km təşkil edir. 2018-ci il iyunun 12-də TANAP-ın bu hissəsinin rəsmi açılış mərasimi keçirilib, iyunun 30-da isə TANAP-la Türkiyəyə ilk kommersiya qazının tədarükü başlanıb. Kəmərin ilkin illik ötürücülük gücü 16 milyard kubmetr təşkil edir. Bu həcmin 6 milyard kubmetri Türkiyədə istifadə olunacaq, 10 milyard kubmetri isə Avropaya nəql ediləcək.
Şərhlər
Bir az ora-bura,o kəndə-bu rayona asfaltdan-zaddan,bir az da o telekanala-bu telekanala avadanlıqdan-filandan,qalanına da gör neçə möhtəşəm villa tikiləcək hər il o gəlirlə.Bakı daha da gözəlləşəcək.Gələnlər deyəcək nə gözəl şəhərdi bu,keçən dəfəki gəlişimdən sonra çox dəyişib,heç tanımaq olmur mən ölüm.Ağızlarının suyu axacaq ki,belə şəhərdə yaşayanlar hər halda hər gün çığırtma-plov,fisincan,qoqlu-moqlu yeyirlər.Heç olmayan günlərində mütləq süfrələrini qaşqaldaq bəzəyir.