Nazirlik kart nömrələrinin istənilməsi ilə bağlı pensiyaçılara xəbərdarlıq edib
Əmək və Əhalinin Sosial Müdafiəsi Nazirliyi (ƏƏSMN) pensiyaçılara xəbərdarlıq edib.
Nazirliyin İctimaiyyətlə əlaqələr və kommunikasiya şöbəsinin müdiri Fazil Talıbov bildirib ki, naməlum şəxslər pensiyaçılara zəng edərək onlara pensiya məbləğlərinin artdığını deyirlər və artan məbləğin guya pensiya kartlarına yüklənməsi üçün onlardan pensiya kartlarının nömrələrini istəyirlər.
"Bəzi KİV-lərdə dələduzların pensiyaçı şəxslərə zəng edərək onlara pensiya məbləğlərinin artdığını bildirməsi, artan məbləğin guya pensiya kartlarına yüklənməsi üçün onlardan pensiya kartlarının nömrələrini istəmələri barədə məlumat yayılıb. Həmin zəng edənlərin məqsədi pensiyaçıları aldadaraq onların kartlarından vəsait oğurlamaqdır. Ona görə də pensiyaçıların diqqətinə çatdırırıq ki, heç bir pensiyaçıdan kart məlumatları istənilə bilməz və heç kimə də öz kart məlumatlarını verməsinlər. Onu da bildirim ki, pensiya artdığı halda heç bir pensiyaçıya bu barədə evinə zəng edib məlumat verilmir, sadəcə olaraq artan məbləğ avtomatik şəkildə hesablarına köçürülür", nazirlik rəsmisi vurğulayıb.
Şərhlər
Nazirliyi örtülü bazara çeviriblər.Yalan üzərində iş qurulduğundan əməli,düşüncli bir iş görünmürş.Guya 1147min pensiyaçısı olan ölkədə 6-7 yüz mini minimal pensiya alır? Oyuncaq! Yaxşı,əgər stajsız pensiyaçıya 200 manat pensiya verirsinizsə,o zaman 35-40 il stajı olan,pensiya fonduna maaçından pul köçürülən pensiyaçı niyə 220-230 manat almalıdr? Bu sosial ədalətdən xəbər vermir!