Gürcüstanda siyasi böhran dərinləşir- Hökumət bir necə müxalifət liderini həbs etməyə hazırlaşır

Ötən həftə Gürcüstanda siyasi böhran davam edib. Həftənin əvvəlində iqtidarın kompromisə hazır olduğuna dair müsbət mesajlar daxil olmağa başlayıb. Xüsusən, parlament sədri bildirib ki, müxalifətin növbəti görüşünə kimi iqtidar hamının qəbul edə biləcəyi konstruktiv təkliflər paketi hazırlayacaq. Parlament çoxluğunun lideri Mamuka Mdinaradze hətta yeniliyin çoxmandatlı dairələrə keçid olduğuna eyham vurub. Bu barədə “Qruziya Online” portalının müxbiri Gela Vasadze yazır.

Müxalifət liderlərinin cinayət təqibi

Daha bir insident Tiflisin keçmiş meri, hazırda müxalifətçi “Avropa Gürcüstanı” partiyasının lideri Giqi Uqulavavın iştirakı ilə hava limanında pasport nəzarət zonasında baş verib. Şahidlərin sözlərinə görə, Uqulavaya hücum olub. Hücum edən şəxs cüdo ilə məşğul olan peşəkar idmançı olub. Nəticədə Uqulava və Qabaşvili uça bilməyiblər. Məhkəmə Uqulavanı 2 min lari girov müqabilində buraxıb və ölkədən çıxışına qadağa qoyub.

“Mtavari” telekanalının məlumatına görə, hökumət “Avropa Gürcüstanı” partiyasının liderlərindən biri Giqa Bokeriyanı, həmçinin “Atlantic Council Georgia” təşkilatının rəhbərləri David Sixarulidze və Bata Kuteliyanı həbs etməyə hazırlaşır. Bunun üçün 2011-ci ildə Gürcüstan Təhlükəsizlik Şurasının konsaltinq xidmətinə ayrılan vəsaitlə bağlı 2013-cü ildə qaldırılan cinayət işi yenidən açılacaq.

Vaji Qaprindaşvili işi

Dekabrın 15-i həkim Vaji Qaprindaşvilinin ailəsi işğal xətti yaxınlığında dinc etiraz aksiyası keçirib. Bugünkü aksiyanın təşkilatçıları qismində həkimin ailə üzvləri, habelə onun həmkarları çıxış edib. İşğal xəttindəki aksiyada siyasi partiyaların nümayəndələri, ictimai hərəkat üzvləri, o cümlədən ölkənin dördüncü prezidenti Georgi Marqvelaşvili iştirak edib. İştirakçılar işğal xəttində səmaya ağ şarlar buraxıblar.

Məqalədə deyilir ki, aksiyaya hakim “Gürcü arzusu” partiyasının üzvü, Tiflis Şəhər Şurasının deputatı İrakli Kuxianidzenin “Facebook”-dakı statusu ilə bağlı yaşanan qalmaqal səbəb olub. Belə ki, deputat Qaprindaşvili ailəsini və həkimin özünü “ciddi məkrli təxribatda” ittiham edib. “Sənə deyirlər və özün də bilirsən ki, orada işğalçılar var və səni tutacaqlar. Amma yenə də qəsdən gedirsən... Bilirsən ki, ölkənin işğalçılara müqavimət göstərmək imkanları məhduddur və bütün bunlardan sonra ailən dövlətlə qarşı-qarşıya gələcək – ailən ya axmaqdır, ya da təxribatçı, sənin ananı...”, - Kuxinadze yazıb. Bu bəyanat ictimaiyyətin narazılığına səbəb olub və sosial şəbəkələrdə müzakirə predmetinə çevrilib.

Qaprindaşvili işi üzrə ictimaiyyət vahid mövqe sərgiləyir: iqtidar demək olar girov götürülən həkimi azad etmək üçün səy göstərmir. Bir məsələ də aydınır ki, Gürcüstan hökuməti gec-tez həkimin həbsdə qalmasına qərar verən hakim Fatimə Parastayevaya, habelə Vaji Qapriandaşvilinin qanunsuz saxlanılmasında əli olan vəzifəli şəxslərə qarşı beynəlxalq sanksiya tələb edəcək. Çox güman, bütün bunlar artıq başqa hökumətin başçılığı altında baş verəcək. Hərçənd siyasi piar cəhətdən belə bir addım indiki iqtidar üçün güclü gediş olardı.(Tərcümə: Xarici pressa)